«Qaırat» sapynda oınaıtyn ıvýar shabýylshysy Jerar Goý Qazaqstan premer-lıgasy jaıly, aldaǵy ýaqytta ulttyq quramalardyń birinde oınaǵysy keletini jaıly uefa.com saıtyna suhbat berdi. Bul týraly sports.kz habarlady.
Sońǵy eki maýsymda ol Qazaqstan chempıonatynyń úzdik surmergeni atanǵan ol osy jetistigi jaıly: «О́zime degen senimdiligimniń arqasynda úshinshi jylymdy oıdaǵydaı aıaqtadym. Maǵan berilgen basty tapsyrma – gol soǵý. Alańda júrgenimde tek osy jaǵyn ǵana oılaımyn. Kóńilimdegi kirbińdi joıý úshin qarsy qaqpaǵa gol soǵýym kerek. Jankúıerlerdiń artqan senimi maǵan erekshe kúsh beredi», – dedi ol.
Jasyndaı jarqyldap júrgen oıynshy áıgili klýbtardyń kózine túspeýi múmkin emes. Biraq ol «Qaırattan» keter me eken?
«Ras, maǵan birneshe klýb qyzyǵýshylyǵyn bildirdi. Biraq qazirgi komandammen kelisimshartym áli bir jylǵa deıin jaramdy. Naqtyraq aıtar bolsam, arabtardan, qytaıdan, sondaı-aq Eýropadan birneshe usynys kelip túsken. Ázirge «Qaırattar» keter oıym joq», – dedi Jerar.
Keı fýtbolshylar birneshe komanda aýystyrǵanmen, óziniń stıline keletin klýbty áreń jolyqtyryp jatady.
«26-28 jasta oıynshylarǵa erekshe kúsh bitip, fýtboldyń ne ekenin shynaıy túrde sezinip jatady. Men de dál qazir sol jastamyn. О́zimdi damytý úshin kún saıyn eńbektenemin. Al «Qaırat» maǵan bárin bergen komanda. Bir kezderi Reseıdiń «Krasnodarynda» azdap dop teýip úlgerdim. Úzdikterdiń biri ekenimdi dáleldeýim úshin alańǵa jıi shyǵýym kerek. Biraq ylǵı da shet qalyp jattym. Komandam jeńiske jetip jatqannyń ózinde kóńilimdegi muń seıile qoımady. Eger múmkindigim kóp bolǵanda nátıjeli forvardtyń biri bolar edim», – dep eske aldy.
Suhbattarynyń birinde ol Andreı Arshavın men Anatolıı Tımoshýkti buǵan deıingi áriptesteriniń ishindegi eń úzdigi dep ataǵan bolatyn. Nelikten?
«Tımoshýk Býndeslıgadaǵy áıgili «Bavarııa» komandasynda, al Arshavın «Arsenal» men Reseı quramasynda kóshbasshy oıynshylardyń biri boldy. Álemdik deńgeıdegi qos jigit bizge kelip, kásibı deńgeıge kóterilýimizge septigin tıgizdi. «Qaırat» maǵan deıin de ózindik ornyn qalyptastyryp qoıǵan, al tańdaýly legıonerler kelgennen keıin jaqsara tústi. Qaırat Boranbaev (klýb basshysy) komandany damytý úshin úlken ister atqaryp júr», – dedi ıvýar oıynshysy.
Mansabyn aıaqtaǵan Anatolıı jattyqtyrýshy bolýy múmkin ekendigi jóninde aqparat birneshe ret taraǵan. Fýtbolda adam jaqsy oıynshy bolǵanmen, bapker retinde ózin oń qyrynan kórsete almaıtyndar jetedi. Máselen, áıgili Maradonany alaıyq. Argentınany álem chempıondyǵyna súıregenmen, bapkerlik jolda Germanııadan oısyraı utylyp, ornynan qýylǵany bar. Al Tımoshýktiń joly qandaı bolmaq?
«Ol alańda bizge jón silteıtin jandardyń biri bolatyn. Fýtboldyń qyr-syryn jetik biledi. Bul iste de úlken jetistikterge jetetinine senim artamyn. Álemdik fýtbolda úlken belesterdi baǵyndyrýyna tilektespin!» – dedi.
Jaqynda ol Qazaqstan ulttyq quramasynyń namysyn qorǵaǵysy keletinin málimdegen bolatyn. «Men Uly dala eline kóship kelgenime eki jyldan asty. Jýrnalıster de, jankúıerler de osy suraqty jıi qoıady. Men árıne, daıynmyn. Biraq bul is júzege asýy úshin birinshi meniń tólqujatym bolýy kerek ári federasııadan usynys túsýi kerek», – dep aǵynan jaryldy ol.
Almatynyń komandasy ótken maýsymda chempıondyqtan kezekti márte qur qalyp, el Kýbogynyń fınalynda «Astanaǵa» jol bergen.
«Bir jaǵynan alyp qaraıtyn bolsaq, maýsymdy jaqsy aıaqtadyq dep aıtýǵa bolady. «Qaıratty» Qazaqstannyń úzdik klýby dep senimdi túrde aıta alamyn. «Astanamen» tórt márte kezdesip, úsheýinde jeńiske jettik. Al fınalda aýa raıynyń qolaısyzdyǵyna baılanysty ese jiberdik. Kóbine kombınasııaly fýtbolǵa úırengendikten, tolassyz jaýǵan qardyń saldarynan bul josparymyzdy júzege asyra almadyq», – dedi Goý.
Ivýar oıynshysy buǵan deıin áriptesteriniń ázilge jaqyn ekendigin málimdegen.
«Bizde eshkimge kórsetýge bolmaıtyn bir vıdeo bar. Biraq ony áleýmettik jelilerge shyǵarmaımyn, jýrnalısterge kórsetpeımin. Birde Islambek Qýat kıim salatyn sómkeme oıynshyq órmekshini salyp qoıyp, búkil komanda bolyp, osyny túsirý úshin tyǵylyp kútip otyrǵan eken. Bólmege kirip kelip, sómkemdi asha bergenim sol edi álgi oıynshyq kóz aldyma tiri jándik sııaqty elestep, shoshyp kettim. Bul jaıtty eshqashan umytpaspyn», – dep eske aldy.
Bolashaǵynan zor úmit kúttiretin Baýyrjan Islamhan 23 jasynda kapıtan bolyp úlgerdi. Premer-lıganyń birneshe ret úzdik oıynshysy atandy.
«Ol joǵary deńgeıli chempıonattarda oınaýǵa qabiletti. Jas bolsa da bizge bas bolyp júr. Osy qalpynda toqtap qalmaı, shyńdalyp, biraz belesterdi baǵyndyrady dep úmittenemin», – dedi áriptesi jaıly.
«Astana» men «Shahter» Chempıondar lıgasy men Eýropa lıgasynyń toptyq kezeńinde oınap úlgerdi. Endigi qazaq jankúıerleri tarıhy tereń «Qaırattan» da osy nátıjeni kútip júrgeni belgili.
«Qazaqstan komandalarynyń mundaı chempıonattarda ózderin kórsetkenine ishteı qýanamyn. Qazaq fýtbolynyń damýy úshin munyń úlken septigi tıedi. Al biz kelesi maýsymda osy nátıjege qol jetkizemiz dep úmittenemin. Komandamyz úshin de, jigitter úshin de bul jaqsy bolar edi. Ár maýsym saıyn osyǵan jetsek eken dep armandaımyz. Biraq bolmashy bir qateliktiń saldarynan jolymyz bolmaı ketedi. Máselen, «Makkabıge» qarsy birinshi oıynnyń sońǵy sekýndtarynda gol jiberip qoısaq, 2015 jyly «Bordoǵa» qarsy match ta dál osylaı órbidi. Irikteý kezeńinde ózgelerge qaraǵanda jolymyz uzaq, tórt ujymmen kezdesemiz. Degenmen, toptyq kezeńge túsý úshin barymyzdy salamyz», – dedi Goý.