Maýsymaralyq transfer qyzyp tur

Fýtbolda jankúıer qaýymdy eleń etkizetin jańalyqtardyń biri transfer naryǵy desek, artyq aıtqanymyz emes shyǵar. Qysqy jáne jazǵy transferlik úzilis kezinde júldeden úmitti komandalar quramdaryn ekshep, kúsheıtip alýǵa tyrysady. Bul úrdis bizdiń fýtbolda da bar. Qytaı sekildi álemniń ataqty juldyzdaryn shaqyrmasaq ta, Eýropada júrgen ortańqol oıyn­shy­lar Qazaqstanǵa da kelip jatady.  Kanıas, Tvýması, Goý, Isael, Maksımovıch sııaqty fýtbol­shylardyń arqasynda «Astana», «Qaırat» eýrokýboktarda sátti óner kórsetip júr. Otandyq koman­dalar bıylǵy jyly da qalta­myz kóteretin oıynshylarmen tolyǵýdy bastap ketti. «Astana» sapynan komanda kapıtany Tańat Nóserbaev ketti. Sońǵy 6 jyl boıy elorda klýbynda óner kórsetken fýtbolshynyń kelisimsharty aıaqtalǵan. Erkin agent retinde óziniń burynǵy komandasy «Ordabasyǵa» aýysty. Nóserbaev «Astana» sapynda Qazaq­stan chempıonaty men kýbok dodasy aıasynda 171 oıyn ótkizip, 51 gol soqty, 24 ret nátıjeli pas berdi. Eýrokýbok dodalarynda 24 oıynǵa qatysyp, 3 márte mergendik tanytqan. «Astana» sapynda Chempıondar lıgasynda da, Eýropa lıgasynda da oınady. Sol Nóserbaevty joqtatpaı-dy-a­­ý, tipti asyp túsetin shyǵar dep Stoılov bapker onyń ornyna Albanııa quramasynyń shabýylshysy Azdren Ganı Lýlakýdy attaı qalap aldyrdy. Bul fýtbolshy sońǵy eki maýsymda Rý­mynııanyń «Gaz-Metan» klýby sapynda óner kórsetken. Rýmy­nııa chempıonatynyń eń úzdik surmergeni. Lýlaký 20 oıynda 16 gol soqqan. Shabýyl ótinde jáne qaptaldaǵy jartylaı qorǵaýshy  bolyp ta oınaı alady. Sondaı-aq, «Ertisten» aýysyp kelgen Roman Murtazaev ta «Astananyń» shabýylyn kúsheı­tedi degen senim bar. Al ótken jyly ózin kórsete almaǵan 28 jasta­ǵy Makedonııa fýtbolshysy Agım Ibraımı transferge qoıyl­dy. «Aqtóbe» komandasy bıyl qaıta jańaryp jatyr. Klýb dırektory, bapkeri barlyǵy da aýysty. Burynǵy fýtbolshylardyń kóbisi ketken. Ýkraınalyq maman Igor Rahaev qazirdiń ózinde úsh birdeı legıonerdi shaqyryp úlgerdi. Olardyń arasynda 2005 jyly Argentınanyń jastar quramasy sapynda álem chempıonatynda jeńiske jetken Hýan Manýel Torres bar. Jankúıerler Chako dep atap ketken fýtbolshy álem birinshiliginde búginde dúnıe júzine tanymal juldyzdar Lıonel Messı, Serhıo Agýero, Pablo Sabaletamen birge oınaǵan eken. Rahaev bapkerge Latyn Amerı­ka­synyń fýtbolshylary qatty unaıtyn tárizdi. Brazılııalyq eki legıonerdi de qatarǵa qosty. Olardyń biri Dıas Morreıra Kassıano «Internasonal» komandasyna tıesili bolatyn. Sońǵy maýsymdy Brazılııanyń B serııasyndaǵy «Goııas» klýbynda ótkizgen. Bul fýtbolshyny «Aqtóbe» jalǵa aldy. Biraq qos taraptyń kelisimi boıyn­sha «Aqtóbe» klýby jalǵa berý aqysyn tólemeıdi eken. Ekin­shisiniń esimi – Evanıldo Borges Barbosa Jýnıor nemese jaı ǵana Jýnıno. Qorǵanystyń sol qaptalynda óner kórsetedi. Transfermarkt 1,5 mıllıon eýroǵa baǵalap otyr. Degenmen Jýnıno erkin agent retinde tegin aýysty. Buryn Eýropanyń TOP-klýbtarynyń qosalqy qura­mynda otyrsa da jarnamasy jer jaryp turatyn fýtbolshylar bolady. Mysaly, «Ertiske» Fransııadan Frank Dja Djedje degen shabýylshy keldi. 30 jastaǵy fýtbolshy Kot-d’Ivýar memleketiniń astanasynda dúnıege kelgen. Biraq bala kezinen Fransııada turady. PSJ klýbynyń túlegi. Parıj komandasynyń sapynda 4 resmı oıyn ótkizgen. Sondaı-aq, «Brest», «Grenobl», «Strasbýr», «Vann», «Arl-Avıon», «Nıssa» klýbtarynda óner kórsetken. Fransııanyń jasóspirimder quramasy sapynda 2005 jyly Eýropa chempıony atanypty. Sol kezde Ýgo Lorıs, Ioan Kabaı, Abý Dıabı, Ioann Gýrkıýff sekildi bolashaq juldyzdarmen birge oınaǵan. Fýtbolshynyń jarnamasy táp-táýir. Al oıynyn ýaqyt kórseter. «Ertis» bıyl Eýro­pa lıgasynyń irikteý kezeńine qatysatynyn eske sala keteıik. Bir komandadan ekinshisine aýy­syp jatqan otandyq oıynshylar da jeterlik. Toqtar Jańǵylyshbaı «Tobyldyń», Haırýllın «Aty­raýdyń», Dosmaǵambetov «Oqjet­pestiń» jeıdesin kıdi. Iá, maýsymaralyq transfer qyzyp-aq tur. Bul úderistiń jańa maýsymǵa deıin jalǵasatynyn eske alsaq, siz ben bizdiń fýtbol naryǵyndaǵy áli talaı jańalyqqa kýá bolatynymyz aıdan anyq. Bek TО́LEÝOV ASTANA