Qytaı Ortalyq telearnasynyń (CCTV) ınternette aqparat taratý ortalyǵynyń qazaqsha bólimi redaktory Ybyraı Dúısenulynyń Dımash Qudaıbergenniń «Ánshi» baǵdarlamasyna qatysýy tóńiregindegi áńgimesi.
Dımash basynda sonsha elengen joq
21 qańtar, ýaqyt túngi 22:30. «Hýnan» telearnasyndaǵy «Ánshi» baǵdarlamasyn mıllıondaǵan kórermeni asyǵa kútip otyr. О́ıtkeni, bul qazirgi Qytaı jastarynyń erekshe yqylasyna bólengen birden-bir baǵdarlama dese de bolǵandaı. Qazaqstan eliniń úkilep qosqan úmiti Dımashtyń kelip qatysýy bizdi tipti de tyqyrshytty.
Bul baǵdarlama 2013 jyly bastalǵan. Qytaıshadan tikeleı aýdarǵanda «Men bir ánshimin» dep atalatyn. Bıyl aty «Ánshi» dep ózgertildi. Bıyl besinshi maýsymy. Baǵdarlama ereksheligi – kil tanymal ánshilerdiń qatysatyny. Áýesqoı ánshiler bul baǵdarlamanyń bosaǵasynan syǵalaı almaıdy.
Habar túsirilimi bastalyp, kúni keshe taratylǵanǵa deıin «Ánshige» qatysatyn árbir ánshiniń jarnamalary kún saıyn jiberilip jatty. Dımashtan ózge ánshiler el ishinde ábden tanymal bolǵan, asa mol jankúıerler jınap úlgergeni belgili. Sondyqtan kóp sandy kórermen Dımashtan ózge ánshilerdi asyǵa kútti. Al Dımashtyń jarnamasy onyń kelbetti jigit ekenin aıǵaqtaıtyn birdi-ekili fotosy bolmasa, sonsha keremet kórsetilgen joq. Sondyqtan alǵashynda Dımashtyń jankúıerleri túgeldeı osyndaǵy qazaqtar bolǵany anyq. Al mıllıardtan asatyn Qytaıdaı alyp eldiń aldynda, jalǵyzdyń úni shyqpas degendeı, bizdiń az ǵana qazaq jankúıer bolyp jarytar ma? Degenmen, Dımashtyń talanty men talabyna, «Ánshi» baǵdarlamasy bastala salyp Qytaıdyń án keńistiginde ǵajaıyp «jarylys» jasaıtynyna osy az ǵana jankúıerler shúbásiz sengendeı. Oǵan baǵdarlama shyqpas buryn jazylǵan pikirler de dálel jáne baǵdarlama túsirilý barysynda solardyń arasynda qarańdap júrgen jankúıerler retinde de anyq aıta alamyz.
Sonymen Dımashtyń Qytaıdaǵy qandas baýyry, ózi de ár elde ótken túrli án baıqaýlarynda qazaqtyń atyn asqaqtatyp júrgen Araıdyń jaqsylap tanystyrýymen sahnaǵa kóterilgen Dımashtyń fransýz tilindegi álemdegi óte kúrdeli ándi qaı deńgeıde aıtqanyna ózderińiz kýásizder. Onyń sahnadaǵy kórsetken ónerin «Ánshi» baǵdarlamasynyń áleýmettik jelidegi tekserý nátıjesinde «Dımashty tek boıy bıik, kelbetti jigit eken» dep oılap edim, a dep aýyz ashqan sátinde-aq, onyń aldynda tizerleýge shaq qaldym» dep pikir aıtýshylar jáne osy pikirdi qostaýshylar mıllıondap sanalady deýge bolady.
Dımash eki birinshilikke qatar qol jetkizdi
Dımash tek kórermen men tyńdarmandy ǵana emes, kásibı mamandardy da tańǵaldyrdy. Baǵdarlamanyń sońyndaǵy bılet tastaý (daýys berý) rásiminde Dımash eki túrli birinshilikke qol jetkizdi. Baǵdarlamaǵa qatysqan ánshilerdiń ózara bılet tastaýynda Dımash pen gonkongtyq Dý Lısha birinshi boldy. Bul degenimiz osy birinshi bolǵandar kelesi kezekti baǵdarlamada neshinshi ret án aıtyp shyǵatynyn ózi belgileı alatyn quqyǵyn da alady degen sóz. Osy arada aıta keterlik bir jaıt – Dımashtyń ne úshin birinshi kezeńde alǵash sahnaǵa kóterilgeni. Jarystyń aldynda «Ánshi» baǵdarlamasy jankúıerlerdiń qaısy ánshini qanshalyqty kútetinin teksergen. Nátıjesinde Lın I-Lııandy kórýdi qalaıtyndardyń sany eń kóp bolǵany sebepti ol eń sońynan sahnaǵa shyqty. Iаǵnı, ánshini sahnadan kórýdi qalaıtyndardyń sany boıynsha retke turǵyzǵanda, jankúıeri eń kóbi sońynan, eń azy aldymen shyǵatyny túsinikti ǵoı. Dımash jankúıeri eń az bolǵany sebepti, eń birinshi sahnaǵa kóterildi. Al naq túsirilim alańyndaǵy 500 tyńdarmannyń bılet tastaýy nátıjesinde Dımash birinshi oryndy, Lın I-Lııan ekinshi oryndy, Dý Lısha úshinshi oryndy ıelendi.
Mıkroblogyna mınýt saıyn myńdaǵan adam tirkelip jatty
«Ánshi» baǵdarlamasyna qatysa salyp Dımash Shınlań áleýmettik jelisinen óz blogyn ashqan bolatyn. Baǵdarlamanyń jarnamasy berile bastaǵanda Dımashtyń mıkroblogyna tirkelgen jankúıerler sany otyz myńǵa deıin ǵana kóterildi. Munyń 90 paıyzy qazaq ekeni belgili. Al «Ánshi» baǵdarlamasy berile salyp kóp ótpeı Dımash týraly aqparattardyń kórilimi el ishindegi eń úlken saıttarda aldyńǵy orynǵa shyqty. Dımash týraly aqparattar jáne ony izdeýshilerdiń sany tutas Qytaı keńistigin sharlap ketti deýge bolady. Týra sol sátten bastap Dımashtyń mıkroblogyna tirkelýshiler mınýt saıyn myńnan artty. Baǵdarlama bastalar aldynda 30 myń ǵana edi, búgin qaraǵanymda (23 qańtar 22:24) 542 817-ge jetipti. Týra qazaq ertegilerindegi saǵat saıyn ósetin batyrlar eske túsedi mundaıda.
Kásibı mamandar tańdaı qaqty
«Ánshi» sahnasy ándi oryndaý barysynda burynǵy oryndalǵan nusqalarmen uqsamaıtyn, ánniń basqasha qyry men ánshiniń múmkindigin barynsha ashatyn túrli nusqalardy synap kóredi. Osylaısha mýzyka mamandary Dımash oryndaıtyn fransýz ániniń eń alǵashqy ózgertilgen nusqasyn usynady. Sondaı-aq, Dımashtan pikir alǵanda onyń álpetinen alańdaý baıqaldy. Muny teledıdar aldynda otyrǵan kórermenniń bári kórdi. Bul týraly mýzyka mamany: «Baǵdarlamany áli de jete túsinýiń kerek, saǵan qajeti tyńdarman ánińdi únsiz, júrekpen tyńdaýy ǵana emes, áýeli sol júregi jarylardaı, ornynan turyp aıqaılap keterdeı dárejege jetýge talpyný kerek, sonda ǵana seniń ıe bolatyn upaıyń basqa ánshilerden ústem tura alady» dep túsindirip jatqanyn da estidik.
Eń sońǵy nátıjeni jarııalaıtyn shaqta da «Ánshi» baǵdarlamasynyń rejısseri Dımashtyń baǵdarlamaǵa kelgen alǵashqy kúnnen sahnaǵa shyqqanǵa deıingi aralyqtaǵy mashaqatty jattyǵýy men kóńil-kúıindegi tolqynystardyń qanshalyqty kúrdeli bolǵandyǵyn jáne baǵdarlama úshin asa muqııat daıyndalǵanyn jap-jas ánshiniń jankúıerleri aldynda jaýapkershilikti sonshalyqty bıik deńgeıde sezinetindigin erekshe rızalyqpen aıtyp ótti.
Kelesi kezeń...
Baǵdarlamanyń erejesi boıynsha ár aptada bir qatysýshy shyǵyp qalyp, ornyna jańa úmitker qosylyp otyrady. Kelesi kezeńnen bastap Dımash ózge tanymal ánshilerdiń tanymal ánderin oryndaýy kerek. Qytaısha án aıtý múmkindigin de joqqa shyǵarýǵa bolmaıdy. Osydan biraz buryn Dımash Han Huńnyń «Tań atty» ánin asa sheberlikpen oryndaǵanyn bilemiz. Qazir «Ánshi» baǵdarlamasynyń ekinshi kezeńi túsirilip boldy, Dımashtyń qaısy ándi oryndaǵany jáne neshinshi oryndy ıelengeni ázirge qupııa. Degenmen, beıresmı aqparlarǵa qaraǵanda, Dımash Vıtas «Operasyn» oryndady jáne birinshi orynǵa ıe boldy degen sózder bar. Buıyrsa bul «jumbaqtyń» sheshimine aldaǵy senbi kúni kýá bolamyz.
Jazyp alǵan Ularbek NURǴALYMULY,
«Egemen Qazaqstan»