Qazaqstandyq bıznes memleket jáne úkimettik emes uıymdarmen belsendirek jumys isteý kerek. Mundaı pikirdi QR din isteri jáne azamattyq qoǵam mınıstri Nurlan Ermekbaev bildirdi. Osy oraıda tıimdi úshjaqty seriktestik júıesin ornatý qajet, dep jazady primeminister.kz.
Búginde QR-da osyndaı ózara is-qımylǵa arnalǵan jańa alań bar – bul Azamattyq bastamalarǵa qoldaý kórsetý ortalyǵy. Ortalyq qyzmeti aıasynda bıznes ÚEU-ǵa túrli granttar bere alar edi. Soǵan baılanysty arnaıy oryndarda bıznestiń ÚEU-men áleýmettik seriktestikke qatysýyna monıtorıng júıesin uıymdastyrý óte mańyzdy.
Jalpy, memlekettiń ÚEU-men ózara is-qımyl jasasý deńgeıin ári qaraı arttyrý maqsatynda birqatar júıelik sharalardy iske asyrý usynylady.
Mysalǵa, ortalyq jáne jergilikti memlekettik organdarǵa birlesken jobalarynyń tıimdiligin arttyrý úshin memlekettik áleýmettik tapsyrys qyzmetteriniń sapasyn arttyrý baǵytynda jumystar atqaryp, jobalardyń taqyryptamalaryn qalyptastyrý úderisine ÚEU-dy belsendirek tartý kerek, sonymen qatar, áleýmettik jobalardyń salalyq baǵyttylyǵyn keńeıtý qajet.
Mınıstrlik azamattyq sektor máseleleri jónindegi qoldanystaǵy normatıvtik bazany tekserýmen aınalysýda. Anyqtalǵan kemshilikterdi eskere otyryp, memlekettik áleýmettik tapsyrys nátıjelerin qalyptastyrý, baqylaý jáne baǵalaýdyń, ÚEU qyzmetterin standarttaýdyń naqty quqyqtyq tetikterin ázirleý josparlanýda.
Sonymen qatar, ÚEU-men birge Grant berý erejelerine ózgerister ázirlenip jatyr. Ortalyq memlekettik organdardy taqyryptamalar men qarjylandyrý kólemin qalyptastyrýǵa tartý, al jergilikti atqarýshy organdarǵa óńirlik ÚEU úshin granttyq qarjylandyrý quqyǵyn bólip berý usynylýda.
Mınıstr ÚEU-dyń shaǵyn qalalar men aýyldardaǵy turaqtylyǵyna ol jerlerde aqparattyq-resýrstyq ortalyqtardyń qyzmetin uıymdastyrý arqyly qol jetkizýge bolatynyn aıtyp ótti. ÚEU sarapshylarynyń pikirinshe, oblys ortalyqtarynda, Astana, Almaty qalalarynda ÚEU men bastama bildirýshi azamattar úshin qyzmetterdiń keń spektrin usynatyn konsaltıngtik ortalyqtar qurý qajet. Osy oraıda ákimdikterge «bir tereze» qaǵıdasy boıynsha Azamattyq ortalyqtar ashý úshin bos ǵımarat taýyp berý múmkindigin qarastyrý usynylady. Olardyń qyzmetin úılestirý Azamattyq bastamalarǵa qoldaý kórsetý ortalyǵynyń tarapynan júrgizilýi múmkin.
Budan ózge, bıznes-qoǵamdastyqtardy áleýmettik seriktestikke keńinen tartý úshin memleket, bıznes jáne «ASAR» ÚEU arasynda úshjaqty alań qurý usynylady. Forým formatyn elimizdiń túrli óńirlerinde jyl saıynǵy negizde ótkizý qajet. Atalǵan alańnyń basym baǵyttarynyń biri áleýmettik kásipkerlikti damytý bolady.