Qazaqstanda kómir qyrtystarynan metan óndirý boıynsha keshendi joba ázirlenýde. Bul týraly Úkimet otyrysy barysynda energetıka mınıstri Qanat Bozymbaev baıandady. Onyń aıtýynsha, Qaraǵandy kómir basseıninde kómir qyrtystaryn gazsyzdandyrý esebinen taý-ken jumystaryn júrgizý qaýipsizdigin qamtamasyz etý jáne pılottyq jobalar boıynsha jer qoınaýyn paıdalanýǵa jasalǵan kelisimsharttarǵa sáıkes metandy barlaý boıynsha jumystar júrgizilýde.
Mınıstrliktiń aldynda ónerkásiptik ıgerý úshin kómir qyrtystarynan metan alý mindeti tur. Bul elimizdiń birqatar aımaqtarynda áleýmettik-ekonomıkalyq jaǵdaıdy birshama jaqsartýǵa múmkindik beredi. О́ıtkeni, bul metandy elektr energııasyn óndirý úshin, turmystyq maqsattarda, avtokólikter úshin otyn retinde, metallýrgııa ónerkásibinde jáne hımııa salalarynda paıdalanýǵa bolady. Kómir óndirý barysyndaǵy jumystardyń qaýipsizdigi birshama artyp, qorshaǵan ortaǵa metan shyǵaryndylarynyń kemýi esebinen ekologııalyq jaǵdaı jaqsarady.
Vedomstvo basshysynyń málimetinshe, QR Kásipkerlik kodeksine engizilgen ózgeristerge sáıkes kómir qyrtystarynan metan alýǵa qatysty shekteýler alynyp tastalǵan jáne ol ınvestısııalyq basym jobalardy júzege asyrý úshin, sonymen qatar qoldanystaǵy salyqtyq jáne ınvestısııalyq artyqshylyqtardy alý úshin aıqyndalǵan basymdyqqa ıe qyzmetter tizimine engizilgen. Sondaı-aq, 2016 jylǵy 23 qyrkúıekte QR energetıka mınıstri bekitken Kómir qyrtystarynan metan alý jáne ony barlaý boıynsha is-sharalar jospary jandandyryldy.