20 jasar Saıa Aqanova oıǵa alǵan isin júzege asyrý úshin «Jumyspen qamtý jol kartasy-2020» baǵdarlamasyn paıdalandy, dep jazady palata.kz.
Kúrshim aýylynyń turǵyny kolledjdi bitire salysymen, mal sharýashylyǵymen aınalysý týraly sheshim qabyldapty. Oqýdy jańa bitirgen tehnık-baılanysshyǵa týǵan jerinde jumys tabyla qoımaǵan, alaıda oǵan Kásipkerler palatasy der kezinde kómek berdi.
Ol jaqtaǵylar qyzdyń aýylda bıznes bastaý týraly ıdeıasyna qoldaý kórsetip, otbasylyq mal bordaqylaıtyn alań ashýǵa qajetti qujattar jınaýǵa kómektesti, bıznes-jospar qurýǵa bir kisideı atsalysty. «Jumyspen qamtýdyń jol kartasy-2020» baǵdarlamasy aıasynda Aýyl sharýashylyǵyn qarjylaı qoldaý qorynan nesıe alý úshin qujattar ótkizildi, ótken jyldyń qarasha aıynda nesıe berilip, joba iske asyryla bastady.
Saıanyń óz bıznesin qurýǵa degen qumarlyǵy búkil otbasyn ortaq iske jumyldyrýǵa sep boldy. Onyń aıtýynsha, dál osy baǵytty tańdaýda ata-anasy jastaıynan boıyna sińirgen shydamdylyq, tabandylyq sııaqty qasıetter zor ról atqarǵan eken.
«Men keńselik jumysty emes, mal ósirý sharýashylyǵyn tańdaǵanyma túk te ókinbeımin. Aınalysyp júrgen isimdi jan-tánimmen jaqsy kóremin. Memlekettik baǵdarlama aıasynda bir jarym mıllıondaı qarjy aldym. Osy qarajatqa mal bordaqylaý alańyn jasaı bastadyq. Eńbek pen bar kúsh-jigerimdi jumsasam, bıznesim tabysty bolady dep senemin», – deıdi jas fermer.
Kúrshimdikter Saıa Aqanovany ashyq, aqkóńil, jaıdary qyz retinde tanıdy jáne osy qasıetteri ony aýdannyń jetekshi kásipkeri atanýǵa kómektesedi degen senimde.
«Saıa bizge ótken jyldyń kúzinde keńes alýǵa keldi. Kýrstan ótý arqyly ol sapaly bıznes-jospar qurýdy úırendi, zańnamalyq jáne quqyqtyq normalardy, esep-qısap júrgizýdi, topty josparlap, basqarýdy meńgerdi, sharttardyń mánin, jalpy mindettemelerin túsindi. Biz aýyldaǵy mundaı bastamalardy qýana-qýana qoldaımyz, aýyl sharýashylyǵyn osyndaı jastar damytady», – deıdi Kásipkerler palatasynyń Kúrshim aýdandyq fılıalynyń dırektory Svetlana Kúdedaeva.
Osylaısha, jas kásipkerlerdi qoldaýdyń memlekettik tetigi taǵy bir bıik maqsattyń iske asýyna túrtki boldy. Saıa Aqanovanyń endigi armany – shaǵyn mal bordaqylaý alańyn iri sharýa qojalyǵyna aınaldyrý.