«Yldıladym, órledim... Quldılady er kóńil!..»

Esimi elge belgili fotojýrnalıst Nurmanbet Qızatulynyń ataǵy men daqpyrtyn sono-oý «qoıan jylynan» bir kisideı jaqsy bilemin. Obektıvi qolaqpandaı fotoapparatyn qoltyǵyna qysyp ap aqsaqaldyq jasyna qaramastan jele jortyp júretin aǵamyz oqta-tekte «Egemenniń» Almatydaǵy qosynyna bas suǵyp turady. – Gazetteriń boıshań bolǵaly, tilshileriń oıshań bop bara jatyr, i-ı... – dep qýaqy sóz qaǵytqan ózi de erekshe boıshań aǵamyz «sońǵy betke jaratsańdar bir dúnıe alyp keldim» dep bólmege jyly shyraımen jyly sóılep kirdi. Aǵamyz ádemi fotoetıýd ákelgen shyǵar degenbiz. Sóıtsek, fotoónerdiń sheberi belgili satırık inisimen «telestýdııadaǵy aıtysyn» alyp kelipti!.. Almaty oblystyq «Jetisý» telearnasynyń shoý-júrgizýshisi ázilqoı, satırık aqyn Tolymbek Álimbekuly «Tulǵa» atty ózi júrgizetin habarǵa Nurmanbet Qızatulyn mereıtoıy ústinde shaqyrǵan ǵoı... – Jetpis bes degen jas jaryq dú­nıege kelgen adamǵa az jol emes, yldı men óri qatar júretin ómir jolyńyz ylǵı tegis bolyp, búgingi asýyńyz­da artyńyzǵa qaratatyn alań joq pa? – dep bastaıdy aqyn áńgimesin. – Satıranyń sardary qyshyǵan jerimdi qasyp ótti. Jandy jeri­me tıgen soń jaısyz da bolsa Jákemniń sarynyna salyp bylaı dep ún qattym, – deıdi Nuraǵam. Delebesi qozyp tur. – Ýa, Tolymbek, Tolymbek, Jolaýshymyn joǵym kóp. Kelip qapsyń oqysta, Keter me eken jolym bop. Yldıladym, órledim, Quldılady ór kóńil. Qııa almadym syzyǵyn Tulpar tosar kermeniń. Satıranyń sadaǵyn Senderdeı sozyp kórmedim. Qaljyńnan qamshy órmedim, Saýyrǵa tıse sart etip Sezetin ashy-kermegin. Tekteriń tóre tuqym ba ed, Tórelik tórin bermediń. Kóksholaǵym tepeńdep, Qamshylaımyn jetem dep. Baı qyzyndaı qaǵytqan Saıtan minez – satıra Sapqa qospaı, «bóten» dep, Jel kóńilim jetelep, Úmitsiz shaıtan óter dep. Syqaqtan sybaǵa ala almaı, Kenendeı keıip ótem dep, Júıkesinen eldiń jún sozyp Júr me ekem álde osynda Beker ketip, beker kep. Kókala jal kók bórim Mekendep mysqyl bek tórin, Shıqandarǵa tuz seýip, Shıqyldatyp bókterdiń. Satıradan saraı sap, Aýyzsha ashtyń mektebin, Kópenniń jaýyp shekpenin, Dýalaıyn búgin dep pe ediń? Álde Seıit, Úmbetbaı Itterin qosyp, perimdi Qýalaıyn dep keldiń?! Saýal emes, álde saýapty Alaıyn dep kep pe ediń? – dep tógip-tógip jiberip toqtapty. Sonda Tolymbek te qalyspaı: – Janyp turǵan kókte kún Kórmeppin jasyn tókkenin. Shappasań da tulparmen Úırenipsiz «ertteýin», – dep aǵasyn qushaqtaǵan eken. Uly  Jambyldyń urpaǵy, Jam­byl aýylynyń ıyǵyndaǵy Qy­zyl­­ásker aýylynda týyp-ósken Nur­man­bet aǵa Qızatulynyń qara­ óleń degen­de qarajaıaý emes­tiginen burynnan da habardarmyz. Biraq jýrnalıs­tıkada, jalpy, ónerde oqyrmanyn ǵa­jaıyp fotolarymen ǵana súısintip júretin aıaýly aǵamyzdyń aqyndyqqa «arqasyna qamshy tımese» moıyn bura bermeıtin daralyǵy da bar edi. Sondyqtan da, telestýdııadaǵy ótken sóz saıysyn sóz tórkinin túsiner oqyrmanǵa jedel­detip usyna qoıýdy jón sanadyq... Talǵat SÚIINBAI, «Egemen Qazaqstan» ALMATY Sýretti túsirgen avtor