Gúlnar Sıqymbaeva: О́nerge eshqandaı ókpem joq

Jurt jaqsy ánshini joǵaltqysy kelmeıdi eken. Kórinbeı qalsa izdeıdi, suraıdy, alańdaıdy. Qazir el arasynan «Sońǵy kezderi belgili ánshi Gúlnar Sıqymbaeva kórinbeı ketti ǵoı, jaǵdaıy qalaı eken, qaıda júr?» degen áńgimelerdi jıi estip qalamyz. Qalyń qaýymǵa «Men saǵan ókpelemeımin» atty ánmen tanylyp, á degennen-aq tyńdarmandardyń júregin jaýlap alǵan Gúlnar Sıqymbaeva rasynda sońǵy jyldary kórinbeı júr. Qym-qýyt tirshilik. Ýaqyt – zymyran. О́mirde de, ónerde de urpaq, býyn almasyp jatyr ǵoı dep kóńildi jubatýǵa da bolar edi. Áıtse de, biz eldiń súıikti ánshisi Gúlnar Ermekqyzymen habarlasyp, jaǵdaıyn surap, azdy-kem áńgimelesýdi jón kórdik. – Sońǵy bir jarym jyldan beri Qazaq Memlekettik qyzdar pedagogıkalyq ýnıversıtetinde sabaq berip júrmin, – deıdi biz­ben áńgimesinde ánshi, Qazaq­stan Res­pýblıkasynyń eńbek si­ńir­gen ártisi Gúlnar Sıqym­bae­va. – Aǵa oqytýshy degen dárejem bar. Jalpy, bul jumysqa osy oqý ornyndaǵy óner jáne mádenıet kafedrasynyń meńgerýshisi Gúl­nur О́mirbaeva shaqyrǵan bolatyn. Shynyn aıtý kerek, bizdiń jasymyzda ánshilik ónerdi tastamaı, jalǵastyrý birshama qıyndyq týdyrady. Ol úshin únemi konsert, issaparlarda júrý kerek. Otbasy, bala-shaǵa, tirshilik qamy bar degendeı... Áıteýir, qazir ustaz bolyp, dáris oqyp júrmin. – Buryn ózińizdi konsertterden bólek, respýblıkalyq tele­arnalardyń baǵdarlama­la­ry­nan da jıi kórip turýshy edik... – Iá, oıyńyzdy túsinip otyrmyn... Respýblıkalyq arna­lardyń birazy Almatydan As­tanaǵa kóship ketkendikten be, qazir baıaǵydaı telejobalarǵa, túrli baǵdarlamalyq túsirilim­derge shaqyrý joqtyń qasy. Onyń ústine osyndaı istermen shuǵyldanatyn prodıýserim de joq. Ekrandardan kórinbeı, eldiń nazarynan tys qalyp jatqanyma ózimniń de júregim aýyrady. Biraq ne isteımin? Ras, jan-jaqqa habarlasyp, bir-eki márte izdenip kórdim. Alaıda, «Siz keshigip qaldyńyz, keıinirek habarlasyńyz» degen jaýaptar estigennen keıin, tipten júregim shaılyǵyp qaldy. Árıne, ónerdiń joly qashanda aýyr. О́nerge eshqandaı ókpem joq. О́nerimniń arqasynda óndim-óstim, elge tanyl­dym, abyroı jınadym. Áıtse de, áli de bolsa maǵan bul ba­ǵyt­taǵy jumystardy jandan­dyryp, tynym tappaý kerek sııaqty. – Degenmen de, kóshede, kóp­shilik ortada júrgende jurt tanyp, amandasyp jatatyn bolar... – Tanyp jatady. Árıne, jaqyn kelip amandasýǵa kóbiniń batyly barmaıdy. Biraq, meni kórgende jalt qarap, keıbiri qasyn kerip, tań qalyp, keıbiri qolymen nusqap, áńgime etip jatatyndaryn baıqaımyn. Áıel bolǵannan keıin maıda-shúıde sharýamen «Kók bazarǵa» jıi baramyn ǵoı. Keshe ǵana sol bazarda júrgenimde bir jas jigit kórgen jerden qolymnan ustaı aldy. Ol da «Ápke, kórinbeı kettińiz? Qaıda júrsiz?» degen suraqty jaýdyryp jatyr. Keıbir kezde sonaý Atyraýdan bir jan-ashyr jandar telefon shalyp, jaǵdaıymdy surap, sizdi telearnalardan qashan kóremiz deıdi... Shynyn aıtqanda, qazir kóp nár­se qarjyǵa kelip tireledi ǵoı. Byltyr shyǵarmashylyǵymnyń 35 jyldyǵyn qarjynyń joq­tyǵyna baılanysty atap óte almadym. Biraq óz-ózimdi qamshylap, bul qýanyshymdy atap ótip, el aldynda bir esep berýden áli de úmitim bar. – Ánshilikti tańdaýyńyzǵa ne sebep boldy? Eń alǵash sah­na­ǵa shyqqan kezińiz, qat­ty tolqyǵan, júreksingen sátte­rińiz esińizde me? – Anam Syndar 39 jasynda qaıtys boldy. Keńsharda saýynshy bolyp jumys isteýshi edi, qasynda qolqanat bolyp kómektesip júrdim. Sol aıaýly anamnyń án salǵanyn bir-aq márte estidim. Sol daýys máńgilikke qulaǵymda qalyp qoıdy. Bálkim, anama degen ystyq saǵynyshym, ishtegi muńym, sherim bolar, anamdy oılasam, kóbinese sol án salǵan sáti kóz aldyma keledi. Jaǵymdy úni qulaǵyma estiledi. Ánshilik joldy tańdaýyma osy jaıt ta kóp áser etti ǵoı deımin. Kishkentaı kezimizde aýylda Ýálıhan degen bala syrnaı tartyp, ónerimen eldiń bárin aıran-asyr qylatyn. Boıy bir qarys, syrnaıdy qushaqtaǵanda basy qyltıyp, áreń kórinedi. Dál sol baladaı eldi tań qaldyryp, alǵysyn alýdy men de armandadym. Árıne, ákem muǵalim bolýymdy qalady. Biraq, basqa joldy tańdaǵanyma esh renjigen joq. 3-synypta oqyp júrgende Mentaı Jalbıev degen aǵaıymyz kórshi aýylǵa aýdandyq baıqaýǵa alyp bardy. Sonda sahnaǵa shyǵyp, bir shýmaq óleń oqydym. Qanshama ret úlken sahnaǵa shyǵyp án saldym, qanshama ret tolqydym, júreksindim... Biraq bala kezdegi sol sahnaǵa shyqqanym, qatty tolqyp ábirjigenim, eldiń rıza bolyp qol shapalaqtaǵany, kádimgideı arqalanyp, aýylǵa bal-bul janyp qaıtqanym esh esimnen shyqpaıdy. Áńgimelesken Oralhan DÁÝIT, «Egemen Qazaqstan»