Biz buǵan deıin de Ýnıversıada saltanatyna oraı Almatydaǵy barsha saýda ortalyqtary taýarlaryn arzandatyp, týrıster tartýǵa septigin tıgizetini týraly habarlaǵan edik. Juma, ıaǵnı 20 qańtarda bastalǵan aýqymdy jeńildikter jármeńkesine Almatydaǵy 200-den astam saýda ortalyqtary men dúkender jelisi qosyldy.
Aptanyń sońǵy jumys kúninde qala ákimi Baýyrjan Baıbek BAQ ókilderimen birge jeńildikter festıvaline qatysatyn birqatar saýda oryndaryn aralap shyqty.
Aldaǵy 10 aqpanǵa deıin jalǵasatyn «Almaty Sales Festival – Winter-2017» festıvaline álemge tanymal 500-ge jýyq brendti usynatyn ári «street retail» formatynda jumys isteıtin 100 saýda ortalyǵy, 100 dúken qatysýda. Almatylyqtar men qala qonaqtary kıimderdi 80 paıyzǵa deıingi jeńildiktermen satyp ala alady. Sonymen qatar, kosmetıkany 20 paıyzǵa deıingi, zergerlik buıymdardy 40 paıyzǵa deıingi, turmystyq tehnıka men basqa taýarlar da arzan baǵamen bosatylmaq.
Otandyq saýda markalary da Ýnıversıada – qala men almatylyq kásipkerler úshin mańyzdy joba ekenin alǵa tartyp, jeńildikter festıvaline qoldaý kórsetý arqyly óz úlesterin qosa alatyndaryna maqtanady.
Taýarlardyń arzandatylǵanyn estı sala, mundaı múmkindikti jiberip almaýǵa umtylǵandar arasynda tanymal óner juldyzdary da tabyldy.
«Biz barlyǵymyz Ýnıversıadany asyǵa kútýdemiz. Sportshylarymyzǵa qoldaý kórsetý úshin mindetti túrde jankúıer bolamyz. Jeńildikter festıvali týraly estı sala, unatqan kıimderdi alýdy jón kórdik. Biz alǵan taýarlar qonymdy, sport nysandarynyń ishinde kıip júrýge qolaıly», – deıdi RIN’GO tobynyń solısi Danııar О́tegen jáne ánshi Mádına Sádýaqasova.
Sol sııaqty, saýda ortalyqtarynda túrli taqyryptyq sharalar, qolónershiler jármeńkesi, qazaqstandyq dızaınerlerdiń kórmesi, balalar úshin sheberlik synyptary, konserttik baǵdarlamalar uıymdastyrylýda.
«Biz radıodan qalada jeńildikter festıvaliniń bastalǵanyn estı sala qurbym ekeýmiz birden dúken aralaýǵa shyqtyq. Qyzyǵyp júrgen taýardy arzan baǵaǵa satyp alý da qýanysh», – dedi Aısulý atty stýdent qyz.
«MEGA Alma-Ata» saýda ortalyǵynda bolǵan qala ákimi Ýnıversıadaǵa bılet satatyn kassaǵa da bardy. Ol jerdegiler konkımen mánerlep syrǵanaýǵa, hokkeıge qyzyǵýshylyqtyń kóp ekendigin, al qazaqstandyq hokkeıshilerdiń oıyndaryna bıletterdiń túgel satylyp ketkendigin, orynnyń joqtyǵyn aıtty. Jalpy, búgingi kúnge deıin 200 myń bılettiń 86 myńy satylǵan.
ALMATY