Sırııadaǵy jaǵdaıdy retteý jónindegi halyqaralyq kezdesýdiń qorytyndylary boıynsha
Qazaqstan Respýblıkasy Syrtqy ister mınıstrliginiń
MÁLIMDEMESI
Qazaqstan Respýblıkasynyń Syrtqy ister mınıstrligi ústimizdegi jylǵy 23-24 qańtarda ótken sırııalyq retteý boıynsha halyqaralyq kezdesýdiń qorytyndylaryn quptaıdy. Bul kelissózderdi ótkizý kepildik berýshi memleketter Reseı, Túrkııa jáne Irannyń kúsh-jigerleriniń arqasynda BUU jáne AQSh-tyń qatysýymen múmkin boldy. Qazaqstan qazirgi Astana úderisiniń sheńberinde qol jetkizilgen ýaǵdalastyqtar sırııalyq daǵdarysty BUU Qaýipsizdik Keńesiniń 2254 (2015) qararyna sáıkes Jeneva úderisi aıasynda saıası retteýge oń serpin beredi dep sanaıdy. Astana sırııalyq qaqtyǵystyń taraptary BUU Qaýipsizdik Keńesiniń 2336 (2016) qararyna sáıkes Sırııada atysty toqtatý rejimi boıynsha ózderine júktegen mindettemelerge berik bolady degen úmit bildiredi. Qazaqstan, biletinderińizdeı, Astanada 2015 jyly birqatar sırııalyq oppozısııalyq toptar arasynda kelissózderdiń eki raýndyn ótkizdi, sondaı-aq 2016 jylǵy jeltoqsanda Sırııa halqyna 500 tonna kóleminde izgilik kómek jetkizdi. 2017-2018 jyldary BUU Qaýipsizdik Keńesiniń turaqty emes múshesi retinde Qazaqstan óńirlik jáne jahandyq qaýipsizdikpen baılanysty máselelerdi sheshý jolynda barynsha kúsh-jiger jumsaıtyn bolady jáne, bul rette, sırııalyq daǵdarysty retteý boıynsha úderiske óziniń úlesin qosýǵa daıyn.