Qostanaı oblystyq ishki ister departamentiniń 2016 jylǵy jumys qorytyndysy boıynsha ótken keńeıtilgen májiliste ótken jyly oblysta qylmystyń tirkelýi aldyńǵy jylǵa qaraǵanda 11,3 paıyzǵa azaıǵanymen, urlyqtyń órship turǵany aıtyldy.
Keńeıtilgen májilis jumysyna qatysqan elimizdiń Ishki ister mınıstriniń orynbasary Erlan Turǵymbaev jalpy qylmys qurylymynda Qostanaı oblysynda ǵana urlyq byltyr 63 paıyzǵa kóbeıgenin aıtty. Ol jalpy urlyqty azaıtý, onymen kúresti kúsheıtý úshin elimizde jasalyp jatqan jumystardan habardar etti. Qymbattaýyna baılanysty uıaly telefondar urlyǵy kóbeıip barady. Onyń aıtýynsha, Ishki ister mınıstrligi men elimizdegi uıaly baılanys operatorlary arasynda urlanǵan abonenttik qurylǵylardy shekteý, óshirip qoıý týraly birlesip jumys isteý jóninde memorandýmǵa qol qoıyldy.
Elbasy elimizdegi Baılanys týraly zańǵa ózgertýler men tolyqtyrýlar engizý týraly zańǵa qol qoıdy. Onda kórsetilgendeı, endi telefondardyń abonenttik nomerleri IMEI-kod jáne onyń ıesiniń IIN-i boıynsha tekseriletin bolady. Eger nomerler sáıkes kelmese, telefon óshiriledi. Ony eshkim de paıdalana almaıdy. Turǵymbaevtyń aıtýynsha, bul jurtty bóriktirip, terrorlyq jarylystar týraly telefonmen ótirik aqparat beretinderden qutylýǵa da septigin tıgizbek.
Sonymen qatar qazir lombardtar da urylardyń ákep ótkizgen zattaryn qaramaı satatyndyǵy aıtyldy. Qaltaǵa túsetinderge de zardap shegýshimen tatýlastyrý arqyly isin sotqa jetkizbeı jumsaqtyq tanytylady. Mınıstrdiń orynbasary aldaǵy ýaqytta urlyqty qaıtalaǵandar úshin zańdy qataıtý jaǵy qarastyrylatynyn da eske saldy.
Názıra Járimbetova, «Egemen Qazaqstan»