Qańtardyń 25-ine qaraǵan túni qytaıdaǵy qazaq ádebıetiniń kórnekti ókili, aqyn, sóz zergeri, qadirmendi aqsaqal Zadaqan Myńbaı 78 jasynda qaıtys boldy.
Zadaqan Myńbaı 1939 jyly Qytaıdyń Shyńjań ólkesine qarasty Tarbaǵataı aımaǵy Dárbiljin aýdanynyń Qarakemel aýylynda dúnıege kelgen. Ol qytaıdaǵy qazaq ádebıetiniń negizin qalaýshy iri tulǵalardyń biri. 1960 jyly Shyńjań ınstıtýtyn bitirgen. 1960-1980 jyldary Qytaıda júrgizilgen solshyl saıasat kesirinen 20 jyldaı jazyqsyz aıdaýda bolǵan. Aqtalǵannan keıin 1980-1997 jyldary aýdandyq sotta advokat bolyp qyzmet istep, 1997 jyly demalysqa shyqqan. Baspasózderde shyǵarmalaryn jarııalaý quqyǵyn da sol kezde áreń qalpyna keltirgen.
Zadaqan Qytaı jazýshylar qoǵamynyń, Qytaı az sandy ulttar qoǵamynyń múshesi, Shyńjań jazýshylar qoǵamynyń múshesi jáne turaqty ókili, Ile Qazaq avtonomııaly oblystyq jazýshylar odaǵynyń múshesi. Onyń «Kókeıtesti» «Betpe-bet» atty óleńder, «Dala zańy» atty dastandar jınaǵy jáne ózge de kitaptary jaryq kórgen. «Betpe-bet» jańa dáýir ádebıeti úzdik shyǵarma syılyǵyna, «Dala zańy» Qytaı az ulttar ádebıeti úzdik shyǵarmasy syılyǵyna ıe bolǵan. Onyń «Eı, otynshy!» deıtin óleńi sol kezdegi solaqaı saıasattyń soıyl soǵarlaryna arnalǵan edi. «Eı otynshy, qyrshyn taldy qımashy, Jup torǵaıdy úrkitpeshi, qýmashy. Jasty qısań qýaryp jer qushady, Jupty qýsań eki aıyryl ushady. Aza boıym qaza bolyp osyǵan, Baltań maǵan tıerdeı-aq shoshynam. Nege deseń, men de aıyrylǵam jubymnan, Jas úmitim qyrshynynan qıylǵan», -dep óziniń óksip ótken jastyq shaǵyn, qııanatshyl solshyldarǵa degen ashý, yzasyn aıtady aqyn. Bul ballada Qytaıdaǵy qazaq oqýshylaryna arnalǵan oqýlyqqa enip, keńinen tanymal bolǵan.«Zadaqannyń aqyn júregi atalarynan kele jatqan adamshylyq qasıet, asyl mura, arly sóz... bárin-bárin aıalap ótti» deıdi qalamdas, zamandastary. Oǵan onyń shyǵarmalary jaýap berip turǵandaı. О́ziniń ata-qonys, týǵan dalasyn, aıqysh-uıqysh aıǵyzdaǵan mashınanyń izinen de qyzǵanatyn qyzǵysh aqyn bylaı tolǵaıdy:
Shofer balam, rahmet, kete ber, Mashınańa otyrmaımyn, keshe gór! Qystaýlyqqa jaıaý jetem ózim-aq, Saı-salanyń bári maǵan tóte jol! Áne qystaý, aramyzda bir kezeń, Sen zyrlaıtyn tas jol emes bul degen! Qyr aınalyp, shyr aınalyp jetesiń, Jylǵa qýyp, ylǵı jaıdaq júlgemen... Maı kúreńse, aq betege shirkindi, Dóńgelegiń túteleıdi-aý, qyrshıdy. Bir júrgende-aq qos aıyldyń tabyndaı, Qalady artta surqyl tańba bir túrli... Rahmet!.. Mashınańdy taıatpa, Otyrmaımyn taıansam da taıaqqa!.. Búıtip meni jaıaýlyqtan qutqaryp, Batamdy alyp, batam deme saýapqa. Súrkeıli edi tyńǵa túsken iz qandaı, Qý janyma sol batady yzǵardaı! Qınalamyn mashınańda otyryp, Júregimdi qos qandaýyr syzǵandaı.«Poezııa tiliniń qudireti de sol ǵoı, anyǵynda bul dalany aıǵyzdap jatqan qandaı kólik, ne tehnıka? Árıne, ol dalaǵa iz qaldyryp júrip ótken mashınany ǵana aıtyp otyr ma? Álde órisine ózgeler ıelik etip, ne bir alyp tehnıkalarmen astyn qazyp altynyn alǵanyn aıtyp otyr ma?.. Mine, óleń osylaı mazmunyn baıyta túsedi» dep tarqatady ádebıet synshylary.
«Jalpy, Zadaqannyń názik lırıkaǵa toly óleńderi oqyrmandaryn esh ýaqytta beı-jaı qaldyrǵan emes, onyń óleńderi neshelegen qabattardan turady. Qyzyǵy, ár oqyrman óziniń óresine qaraı alaryn alyp, ary qaraı tereńine súńgı alǵandar «minsiz taza asyl tastaı» marjandaryn súzip alady» dep jazady ádebıettanýshy, jýrnalıst B. Sultanuly. О́le-ólgenshe qazaq rýhanııatyna qyzmet etip ótken qarymdy qalamgerdiń jaqyn týystaryna qaıǵyryp kóńil aıtamyz. Aldy peıish bolǵaı!