Pavlodarda bıyl oqý jyly aıaqtalysymen 32 mektepte 11-synyptyń 899 oqýshy attestatpen birge júrgizýshi kýáligin alyp shyǵady. Olardyń 469-y ul bala bolsa, 420-y – qyzdar. Bul týraly pavlodarnews.kz habarlady.
«№1 oqý-óndiristik kombınatynyń materıaldyq-tehnıkalyq bazasy tolyq saqtalǵan. Jol qozǵalysy erejesi boıynsha segiz kabınet, alǵashqy medısınalyq kómek kórsetetin eki kabınet jumys isteıdi. Avtomobıl parkinde jeti jeńil kólik pen tórt júk kóligi bar. Oqytý úrdisi kezinde oqýshylarǵa kólik quraldaryn júrgizýdi 12 ustaz úıretedi. Olardyń barlyǵy arnaıy kýrstan ótken jáne kýálikteri men joǵary tehnıkalyq bilimi bar. Oqý «V» sanatyndaǵy kólik quraldary júrgizýshilerin daıyndaý boıynsha tehnologııa páni esebinen júrgiziledi. Kýrsty sátti aıaqtap, emtıhan tapsyrǵannan keıin júrgizýshi kýáligi beriledi. Budan ári túlekter memlekettik avtoınspeksııasynda emtıhan tapsyrady da júrgizýshi quqyǵyna ıe bolady», – deıdi qalalyq bilim berý bólimi basshysynyń orynbasary Galına Shındlıarskaıa.
Statıstıkaǵa súıensek, sońǵy bes jyldyń ishinde 3000-nan astam oqýshyǵa júrgizýshi kýáligi tabystalǵan. Máselen, 2013 jyly 905, 2014 jyly 800, 2015 jyly 655, 2016 jyly 689 túlek kólik júrgizýdi meńgergen. Bul olarǵa 18 jasqa tolǵannan keıin kólik quralyn basqarý quqyǵyn beredi.
Aıta keteıik, Bilim jáne ǵylym mınıstri Erlan Saǵadıev 2017 jyldan bastap elimizde oqýshylar alǵashqy áskerı daıyndyq sabaǵynda kólik júrgizip úırenetini týraly aıtqan bolatyn. Mundaı jańashyldyq kóshelerde balanyń jaraqattaný oqıǵalaryn azaıtýǵa múmkindik beredi. Bul usynysty Qorǵanys mınıstrligi de maquldaǵan.