О́zin ózi basqarýdyń tıimdi joldary qandaı?

Keshe Májiliste palata Tóraǵasynyń orynbasarlary Vladımır Bojko men Gúlmıra Isimbaevanyń qatysýymen jergilikti ózin ózi basqarýdy damytý jáne azamattardyń oǵan qatysý múmkindigin keńeıtý máselelerine arnalǵan dóńgelek ústel bolyp ótti. Sharany Ekonomıkalyq reforma jáne  óńirlik damý komıtetiniń tóraǵasy Nurtaı Sabılıanov ashyp, júrgizip otyrdy. Budan buryn, Májilistiń jalpy otyrysynda, Memleket basshysynyń Ult josparyndaǵy 97 jáne 98-qadamdardy iske asy­rý maqsatymen  aýyldyq ákimdik­terge bıýdjet engizý máselesi týraly zań jobasy birinshi oqy­lymda maquldanǵanyn aıtqan bolatynbyz. Eske sala ketsek, oǵan sáıkes 2500-deı aýyldyq, kenttik ákimdikterde bıýdjet ashylyp, olarǵa keıbir salyqtar men aıyppuldardan jáne kommýnaldyq menshikterdi satýdan túsetin 110 mlrd teńgedeı qarajat quıylmaq. Zań jobasyn talqylaý barysynda aýyldyq ákimdikterdiń qarajatty durys ıgerý, zańǵa sáıkes maqsatty jum­saý isterine kóptegen kúmán­dar keltirilip, olardyń sybaılas jemqorlyqqa jol berýi múm­kin delingen kúdikter de aıtyl­ǵan. Májilis Tóraǵasy N.Nyǵ­ma­týlın Ulttyq ekono­mıka mınıstrine arnaǵan qory­tyn­dy sózinde ákimderdi qarajat ıge­rý jumysyna úıretý tek semı­nar-keńestermen ǵana shektelmeı, ar­naýly kýrstarda oqytý kerek­tigin de aıtqan bolatyn. Keshegi dóńgelek ústelde negi­zinen osy baǵyttaǵy jumystar sóz etildi. Baıandama jasaǵan Ult­tyq ekonomıka vıse-mınıstri Aı­batyr Jumaǵulov aýyl ákim­deriniń bıýdjetti ıgerýge daıyndyǵy týraly sóıledi. Onyń sózine qaraǵanda, 2016 jyly «Zerde» oqytý ortalyǵynyń bazasynda 1381 aýyl ákimi arnaýly kýrstan ótipti. Bul – barlyq ákimderdiń 56 paıyzy. Sonymen qatar, Memlekettik basqarý akademııasy aımaqtyq oqytý ortalyqtarymen birlese otyryp, aýyl ákimderi men onyń apparatynyń qyzmetkerleri úshin ózin-ózi basqarýdyń quqyqtyq negizderi, bıýdjetti josparlaý men ázirleý, qorǵaý men oryndaý tártibi, býhgalterlik esepti júrgizýdiń erekshelikteri týraly semınarlar uıymdastyrǵan.  «Ákimder men apparat basshylaryn oqytý úshin jańa maqsatty baǵdarlama iske qosyldy. Ulttyq ekonomıka mınıstrligi ákimderdi 4-shi deńgeıli bıýdjetpen jumys isteýge daıyndaý úshin jalpy úılestirý jumystaryn júrgizbek», – dedi A.Jumaǵulov. Sonymen birge, arnaýly daıyndyqtan ótken 36 oqytýshy 14 aımaqtyq oqytý bazalarynda ákimder men apparat qyzmetkerlerine ustazdyq  jasaıdy eken. Oqý merzimi aıaq­talǵan soń ákimder men qyz­met­kerler test tapsyratyn kórinedi. Baıandama aıaqtalǵan soń A.Ju­ma­ǵulovqa kóptegen suraq­tar qoıyldy jáne qosymsha usy­nystar jasaldy. Depýtattar­dyń bul iske belsendi túrde aralas­qan­dyǵy memlekettik múddege ja­nashyrlyq ekendigi kórinip turdy. Dóńgelek ústelge elimizdiń aımaqtarynan kelgen aýyldyq okrýgterdiń ákimderi de qatysyp, ózderiniń oılaryn ortaǵa saldy. Olar ózderiniń sózderinde bıýd­jettiń engizilgenin negizi­n­en quptady. Al ony ıgerý men maqsatty jumsaýda sonsha­lyqty tyǵyryqqa tirele­tindeı máseleniń joqtyǵy kól­de­neń tartyldy. О́ıtkeni, kóp­ten istegen ákimder qarjy bólin­­gen jaǵdaıda bıýdjetti qalaı jum­saýdy baıaǵyda-aq josparlap qoı­ǵandaryn aıtty. Dóńgelek ústelge Qarjy, Aqparat jáne kom­mý­nıkasııalar, Ádilet, Den­saýlyq saqtaý jáne áleýmettik damý mınıstrlikteri men Mem­lekettik qyzmet jáne sybaılas jemqorlyqqa qarsy is-qımyl agenttiginiń, Ulttyq kompanııa­lardyń ókilderi qatysty. Dóń­gelek ústel qorytyndysy boıyn­sha Úkimetke usynystar ázir­lenetin boldy. Jaqsybaı SAMRAT, «Egemen Qazaqstan»