«Qaınar-AKB» kásiporny óz ónimderin Benın Respýblıkasyna jetkizýdi bastady, dep jazady palata.kz.
Elimizdegi akkýmýlıator qurastyratyn jalǵyz kásiporyn – «Qaınar-AKB» jańa kezeńge aıaq basty. Kompanııa «BARS Asia» akkýmýlıatorlarynyń alǵashqy partııasyn Afrıka qurlyǵyna jetkizdi. Qazir qazaqstandyq akkýmýlıatorlardy Benın Respýblıkasynda synaqtan ótkizip jatyr. «Qaınar-AKB» Benındegi dúkender jelisimen seriktestik ornatqan, «BARS Asia» markasynyń batareıalary osy dúkender arqyly satylmaq.
«Afrıka turǵyndary qazaqstandyq kásiporyn qurastyrǵan akkýmýlıatorlardyń sapasyn joǵary baǵalady. «Qaınar-AKB» endi Afrıka naryǵyna «tastaı batyp, sýdaı sińýdi» maqsat etip otyr», – deıdi kompanııanyń baqylaýshy keńes tóraǵasy Qýanysh Ájmaǵanbetov.
О́tken jyly «Qaınar-AKB» 1 mln 884 myń akkýmýlıator qurastyryp, Qazaqstan naryǵynyń 90%-yn otandyq akkýmýlıatorlarmen qamtamasyz etken. «Kainar» jáne «Bars» akkýmýlıatorlaryna rebrendıng jasalyp, olar Qytaıǵa jetkizile bastady. Jaqyn arada kásiporyn Eýropa naryǵyna shyǵýdy josparlap otyr. Buǵan deıin Polsha Respýblıkasymen saýda kelisimin jasaǵan bolatyn. Qazirgi tańda akkýmýlıator zaýyty ónimderiniń kóp bóligi TMD men alys-jaqyn elderge satylady. «Qaınar-AKB» ónimderi eýropalyq, reseılik, japonııalyq standarttarǵa da sáıkes keledi.
Esterińizge sala keteıik, 2016 jyly «Qaınar-AKB» elimizdiń úzdik eksporttaýshylaryna beriletin «Uly dala eli» brendin jeńip alǵan edi.