Qystyń tańy kesh atady. Elimizdegi eń dúbirli oqıǵa bolyp otyrǵan HHÚSh dúnıejúzilik qysqy ýnıversıada alaýynyń óńirlik estafetasyn ótkizýge qostanaılyqtar A.Baıtursynov atyndaǵy Qostanaı memlekettik ýnıversıtetiniń aldyna jınalǵanda kún kókjıekten áli kórinbep edi. Oblys ákimi Arhımed Muhambetov ýnıversıada alaýyn ustaýshylar men sportshylarymyzdyń jankúıerlerin quttyqtady.
«Bizdiń elimiz ýnıversıadaǵa 1993 jyldan bastap qatysyp keledi. Osy jyldar ishinde elimizdiń 700 sportshylary álemdik sport dodasynan 125 medal qanjyǵalaǵan eken. TMD elderi boıynsha birinshi bizdiń elimizde ótip otyrǵan ýnıversıadada óz oblysymyzdan jáne elimizden qatysatyn sportshylarǵa jeńis tileımiz» dedi Arhımed Begejanuly. Ýnıversıada alaýynyń Qostanaı óńirlik estafetasynyń saltanatyna Qazaqstannyń Eńbek Erleri Saıran Buqanov, Borıs Knıazev jáne Almat Tursynov shaqyryldy. Olar alaýdy ustaý qurmetine ıe boldy.
Ýnıversıada alaýynyń Qostanaıdaǵy óńirlik shyraǵyn aty ańyzǵa aınalǵan shańǵyshy, 1976 jyly Insbrýkte ótken (Avstrııa) qysqy olımpıadanyń qola júldegeri, sport ardageri Ivan Garanın tutatty. Alǵashqy alaý estafetasyn oblys ákimi Arhımed Muhambetov alyp, Qostanaıdyń sport maqtanyshynyń biri, boksten olıpıadanyń eki ret qola júldegeri Ivan Dychkoǵa tabys etti.
Ýnıversıada alaýynyń óńirlik estafetasyna Qostanaı oblysyndaǵy eń úzdik sportshy stýdentter, shyǵarmashylyqta, kásipkerlikte tabysqa jetken jastar--barlyǵy 60 adam qatysyp, olar alaýdy 12 shaqyrymǵa júgirip, alyp ótti.
Qostanaıdan ýnıversıadaǵa short-trekten Anastasııa Krestova, konkımen syrǵanaýdan Aleksandr Klenko, shańǵy jarysynan Vıtalıı Pýhkalo jáne shaıbaly hokkeıden Maksım Grıaznov qatysady. Olar Qostanaı memlekettik ýnıvesrıteti men Qostanaı memlekettik pedagogıka ınstıtýtynyń stýdentteri. Ýnıversıada alaýynyń óńirlik estafetasynda belgili opera ánshisi Súndet Baıǵojın jáne jergilikti fılarmonııa ánshileri ánnen shashý shashty.
Názıra Járimbetova, «Egemen Qazaqstan»