Elordanyń Jumyspen qamtý jáne áleýmettik baǵdarlamalar basqarmasynyń málimetterine sáıkes, 2017-2019 jyldarǵa arnalǵan bıýdjette 2017 jyldyń 1 qańtarynan bastap jıyntyq zeınetaqy kólemi 9%-ǵa ósti, al 2017 jyldyń 1 shildesinen bastap Memleket basshysynyń tapsyrmasyn oryndaý maqsatynda jıyntyq zeınetaqy taǵy 11%-ǵa ulǵaıady, dep habarlaıdy Astana qalasy ákimdiginiń baspasóz qyzmeti.
Atap aıtatyn bolsaq, 2016 jyly jıyntyq zeınetaqynyń kólemi 40 000 teńge bolsa, 2017 jyldyń 1 qańtarynan bastap 9%-ǵa ósýdiń arqasynda 43 600 teńgeni quraıdy, al 2017 jyldyń 1 shildesinen bastap taǵy 11%-ǵa ulǵaıatynyn eskersek, 48 396 teńgege jetedi. Osylaısha, jıyntyq zeınetaqy mólsheri 2016 jylmen salystyrǵanda 20%-ǵa artady.
Sonymen birge, bazalyq zeınetaqy mólsheri de ulǵaıdy: 2017 jyldyń 1 qańtarynan bastap - 7%-ǵa, 2017 jyldyń 1 shildesinen bastap taǵy 13%-ǵa ósedi. Eger 2016 jyly bazalyq zeınetaqy kólemi 11 965 teńge bolsa, 2017 jyldyń 1 qańtarynan bastap 7%-dyq ósimmen onyń kólemi 12 802 teńgeni quraıdy, al 2017 jyldyń 1 shildesinen bastap 13%-ǵa artyp, 14 466 teńgege jetkiziledi. Osylaısha, bazalyq zeınetaqy mólsheri 2016 jylmen salystyrǵanda 20%-ǵa artady.
Tólemderdi «Astana qalasynyń Azamattarǵa arnalǵan úkimet memlekettik korporasııasy» UAQ fılıalynyń MZTO Departamenti respýblıkalyq bıýdjetten júrgizedi: zeınetaqynyń eń tómengi mólsheri - 40 950 teńge, zeınetaqynyń ortasha kólemi - 68 855 teńge, zeınetaqynyń eń joǵarǵy mólsheri 82 574 teńge, osy rette aılyq eseptik kórsetkish 2 269 teńgege teń ekenin atap kórsetý kerek.