Kókshetaý. Elimizdiń birneshe óńirindegi sııaqty, 26 qańtarda Kókshetaý qalasynyń «Táýelsizdik» alańynda Aqmola oblysynyń ákimi Sergeı Kýlagınniń qatysýymen Almatydaǵy HHVIII Dúnıejúzilik qysqy Ýnıversıada alaýyn jaǵý rásimi ótti. «Alaý estafetasynyń» tuǵyry Uly Otan soǵysynda Batyr ataǵyn eki márte alǵan Talǵat Bıgeldınov pen Keńes Odaǵynyń Batyry Málik Ǵabdýllınniń eskertkishi janynda ornalasýy jigerli halqymyzdyń rýh qaınaryn tasytýda. Kókshe aspanynda myń san eriktiler shyrqaǵan «Qazaqstan, alǵa!» áni qalyqtaǵanda «Táýelsizdik» alańy tebireniske bólendi. Ýnıversıadanyń óńirlik alaýyn dúbirli dodanyń bas keıipkeri – balapan «Suńqar» jaqty.
Alaý estafetasynyń birinshi kezeńin shańǵy sportynan álem chempıony Tatıana Osıpova asqaq kóterip, 60 alaýgermen birge 12 shaqyrymdyq mártebeli máreni bastady. Tańdaýlylar oqýda, ǵylymda jáne sportta úzdik kórsetkishterge jetip, aımaq pen elimizdiń abyroıyn asqaqtatqan sańlaqtardan iriktelgen.
Alaý estafetasynyń aımaqtyq kezeńin Qazaqstan Respýblıkasynyń eńbek sińirgen sport sheberi, bokstan Ulttyq quramanyń múshesi, 2016 jylǵy álem chempıony, A.Myrzahmetov atyndaǵy Kókshetaý ýnıversıtetiniń stýdenti Dına Jolaman aıaqtady. Sondaı-aq, Dına Jolaman ári qaraı Aqmola oblysynyń alaý estafetasyn Almaty qalasyna alyp baryp, Ýnıversıadanyń ashylý saltanatyna qatysady.
Osy rette, aqmolalyq 19 sportshy Ýnıversıada baǵdarlamasyndaǵy sporttyń 4 túrinen synǵa túsetinin aıta ketkimiz keledi.
Ýnıversıada alaýyn jaǵý saltanaty sporttyq, mádenı sharalarmen jalǵasty.
Baqbergen AMALBEK,
«Egemen Qazaqstan»
Qaraǵandy. Dúnıejúzilik XXVIII qysqy Ýnıversıadanyń alaý estafetasy Qaraǵandy oblysynda Elbasymyz Nursultan Nazarbaev eńbek jolyn bastaǵan Temirtaý qalasynda, «ArselorMıttal Temirtaý» AQ metallýrgııalyq kombınatynda bastaldy. Estafetaǵa arnalǵan saltanatta oblys ákimi Nurmuhambet Ábdibekov oǵan qatysýshylarǵa aq jol tilep, ıgi lebizin bildirdi. Ýnıversıada alaýyn №2 domna peshinen gazshy, qazaq kúresinen sport sheberliginen úmitker Álibek Alpysbaev jáne domna peshiniń sheberi, sambodan sport sheberligine úmitker Aqan Espotaev tutatyp, alaýdy birinshi bolyp sorǵy qondyrǵylarynyń mashınısi, voleıboldan sport sheberi Svetlana Gaınýtdınova alyp júrdi.
Rásimniń ekinshi kezeńi tús áletinde oblys ortalyǵyndaǵy «Shahter» stadıonynan bastalyp, «Qaraǵandy Arena» muz aıdynynda máresine jetti.
Oblys ortalyǵynda Temirtaý men Qaraǵandy ákimderi estafeta alaýyn óńir basshysyna tabys etti.
О́ńir basshysy alaýmen estafetanyń alǵashqy 200 metrin júgirip ótip, kezekti QarMTÝ stýdenti Sergeı Ivanovqa tabystady. Qaraǵandyda 60 alaýger aldyn ala tańdap alynǵan. Estafetanyń oblys ortalyǵyndaǵy qashyqtyǵy 9 shaqyrymdy qurady.
Aıtyp ótkenimizdeı, alaý estafetasy «Qaraǵandy Arena» muz saraıynda aıaqtaldy. Qaraǵandylyqtar alaýdy arnaıy qutyǵa salyp, ushaqpen Almatyǵa shyǵaryp saldy. Ony Ýnıversıada astanasyna estafetanyń tehnıkalyq delegaty, boksshy Abylaıhan Júsipov jetkizedi.
Mıras ASAN,
«Egemen Qazaqstan»
* * *
Qostanaı. Oblys ortalyǵynda HHVIII Dúnıejúzilik qysqy Ýnıversıada alaýynyń óńirlik estafetasy ótti. О́ńir basshysy Arhımed Muhambetov Ýnıversıada alaýyn ustaýshylar men sportshylarymyzdyń jankúıerlerin quttyqtady.
Ýnıversıada alaýynyń Qostanaıdaǵy óńirlik shyraǵyn aty ańyzǵa aınalǵan shańǵyshy, 1976 jyly Insbrýkte ótken (Avstrııa) qysqy olımpıadanyń qola júldegeri, sport ardageri Ivan Garanın tutatty. Alǵashqy alaý estafetasyn oblys ákimi Arhımed Muhambetov alyp, Qostanaıdyń sport maqtanyshynyń biri, bokstan Olımpıada júldegeri Ivan Dychkoǵa tabys etti.
Ýnıversıada alaýynyń óńirlik estafetasyna Qostanaı oblysyndaǵy eń úzdik sportshy stýdentter, shyǵarmashylyqta, kásipkerlikte tabysqa jetken jastar – barlyǵy 60 adam qatysyp, olar alaýmen 12 shaqyrymdy júgirip ótti.
Názıra JÁRIMBETOVA,
«Egemen Qazaqstan»
***
О́skemen. Elorda tórinde Elbasynyń ózi tutatqan HHVIII Dúnıejúzilik qysqy Ýnıversıada alaýy keshe Altaıǵa jetti.
О́skemendegi S.Amanjolov atyndaǵy ýnıversıtettiń aldynan bastaý alǵan Ýnıversıada alaýyn tutatý rásimine Olımpıada chempıony Olga Rypakova bastaǵan óńir sportshylary qatysty.
Alaý estafetasyn Olımpıada chempıony, belgili jeńil atlet Olga Rypakovaǵa tapsyrdy. Ári qaraı qala kósheleri boıymen jalǵasqan estafeta kezinde eskek esýshi Ekaterına Smırnovanyń alaýdy qaıyqpen Ertis ózeni arqyly alyp ótip, frıstaılshy Konstantın Gorlachevke tapsyrǵanyn, onyń alaýdy qolyna ustap, bıiktikten sekirgeni qalalyqtardyń esinde qalary anyq.
Alaý shara sońynda «Altaı» voleıbol klýbynyń úzdik oıynshysy, Almatyda ótetin Ýnıversıadanyń ashylý saltanatynda Shyǵys Qazaqstan sportshylaryn bastap shyǵatyn Damır Ákimovke tapsyryldy. Voleıbolshy Ýnıversıada alaýyn Alataý baýraıyna jetkizetin bolady.
Azamat QASYM,
«Egemen Qazaqstan»
* * *
Pavlodar. Qysqy Ýnıversıadanyń aımaqtyq estafetasynyń alaýyn jaǵý saltanaty S.Toraıǵyrov atyndaǵy Pavlodar memlekettik ýnıversıtetinde bastaý aldy.
Saltanatty sharany S.Toraıǵyrov atyndaǵy Pavlodar memlekettik ýnıversıtetiniń rektory, saıası ǵylymdarynyń doktory Aryn О́rsarıev quttyqtaý sózimen ashty.
О́z kezeginde, Pavlodar memlekettik ýnıversıtetiniń rektory Aryn О́rsarıev alaýdy joǵary oqý ornynyń sáýlet-qurylys fakýltetiniń 2-kýrs stýdenti Álem Kenjebekovke tapsyrdy.
Estafeta barysynda 60 alaýger Pavlodar kóshelerimen júgirip ótti. Ýnıversıada alaýyn sportshylardan bólek, qoǵam qaıratkerleri, joǵary oqý oryndarynyń belsendi oqý ozattary jáne Pavlodar qalasy men oblystyń qurmetti azamattary alyp júrdi.
Farıda BYQAI,
«Egemen Qazaqstan»
* * *
Petropavl. Almaty qalasynda ótetin HHVIII Dúnıejúzilik qysqy Ýnıversıadanyń alaý estafetasy M.Qozybaev atyndaǵy Soltústik Qazaqstan memlekettik ýnıversıtetinen bastaý aldy. Jınalǵandar aldynda oblys ákimi Erik Sultanov, jeńil atletshi, halyqaralyq dárejedegi sport sheberi, Azııa oıyndarynyń eki dúrkin jeńimpazy Margarıta Muqasheva sóılep, TMD elderi arasynda Qazaqstannyń mártebeli dodany birinshi bolyp ótkizýi mártebe sanalatynyn, jerlesterimizdiń jeńisten úmitti ekendikterin jetkizdi.
Alǵashqy alaýdy alyp júrý qurmetine Erik Hamzauly ıe boldy. Eki saǵatqa sozylǵan aksııa barysynda 60 alaýger 12 shaqyrym joldy júgirip, basty kósheler boıymen alyp ótti. Olardyń qatarynda Vıktor Bondarenko, Qaıyrly Ediresov, Mıhaıl Dedov, Baýyrjan Quljanov sekildi belgili eńbek, sport ardagerleri de boldy. Sońǵy alaý estafetasyn jas sportshy Nazgúl Maratova sport saraıy aldynda qabyldap aldy.
О́mir ESQALI,
«Egemen Qazaqstan»