MJA Entertainment avstralııalyq promoýterlik kompanııasynyń basshysy Maık Altamýra Danııar Eleýsinov pen Ivan Dychkonynyń kásibı rıngtegi alǵashqy jekpe-jeginde kimniń shyǵatynyn jáne olardyń bolashaǵy jaıly boljamyn aıtyp berdi. Bul týraly vesti.kz habarlady.
«Qazirgi ýaqytta Derık Santov (Sergeı Kovalevtiń eks-bapkeri) Dáýrenmen (Danııardyń aǵasy) Maıamıde jattyǵyp júr. Ol óz isiniń bilikti mamany. Derık aǵaıyndy Eleýsinovterdi jáne Dychkony jattyqtyrady», – dedi promoýter.
Sonymen qatar, ol Eleýsinovtiń álem boksynyń abyroıly ortasyna qosylýdy maqsat etýi kerek ekenin aıtty. «Ol naǵyz has sheberdiń ózi. Mennı Pakıao syndy jartylaı orta salmaqtaǵy kez kelgen bedeldi boksshymen judyryqtasý bolashaqta onyń maqsaty bolýy tıis», – dedi Maık Altamýra.
Danııardyń aǵasy Dáýren jaıly pikirinde ol chempıon bolýǵa múmkindiktiń baryn aıtyp ótti. Aıtýynsha, Dáýrendi kópshilik umytyńqyrap qalǵan, alaıda, ol árdaıym jumys istep, damý ústinde keledi. Orta dıvızıonda áli-aq úlken jetistikterge jetedi degen senim bildirdi.
Al Ivan Dychko jaıly: «Onyń talantyna senemin, asa aýyr salmaqta álemdik deńgeıge shyǵý úshin psıhologııasy, parametri, ıntellekti bar. Londondaǵy jekpe-jegin kórgenmin, Entonı Djoshýamen jekpe-jeginiń nátıjesi daýly. Dychko bolashaqta oǵan ese qaıtarýy múmkin», – dedi.