Qazaqstandyq boksshy Gennadıı Golovkın brıtanııalyq Bıllı Djo Sonderspen aıqasýy múmkin ekendigi jóninde onyń promoýteri Tom Leffler málimdedi. Bul týraly sports.kz habarlady.
«Shynymdy aıtsam, bul jekpe-jek ázirge bizdiń josparymyzda joq. Djeıkobs ońaı qarsylas emes, sondyqtan Golovkınniń bar oıy 18 naýryzdaǵy boks keshi jaıly. Eger ol kúni jeńiske jetse, Saýl Alvarespen ortaq kelisimge kelgimiz keledi», – dedi Leffler.
«Saýl 6 mamyr kúni kezekti urysyn ótkizedi. Al Gennadııdiń bar maqsaty – orta dıvızıondaǵy tıtýldarynyń basyn biriktirý. «Kaneloǵa» qarsy jekpe-jegi osyǵan deıin ótkizgenderiniń ishindegi eń aıtýlysy bolar edi. Naýryz aıynda maqsatymyzǵa jetsek, sońǵy bes jylda armandap júrgen úlken kezdesýler ótkizýge múmkindigimiz bolady dep oılaımyn», – dedi promoýter.
Aıta keteıik, birer kún buryn brıtanııalyq BAQ Golovkın men Sonders bıyl Astanada EKSPO kezinde aıqas ótkizetinin habarlaǵan bolatyn.