QR Ulttyq bankiniń tóraǵasy Danııar Aqyshev 2016 jyldyń qorytyndysynda jyldyq ınflıasııa 8,5 paıyzdyq deńgeıde qalyptasqanyn jarııa etti. Ol bul jaıynda búgin QR Ulttyq banki janyndaǵy aqsha-nesıe saıasaty jónindegi tehnıkalyq komıtettiń qorytyndy otyrysynda málimdedi, dep habarlaıdy QazAqparat.
QR UB basshysynyń aıtýynsha, jaz aılarynda ınflıasııa 17 paıyzdan joǵary deńgeıde boldy. Al nebári 4 aıdyń ishinde onyń 2 esege tómendeýi Ulttyq bank júrgizip otyrǵan saıasattyń durys ekendiginiń kórsetkishi sanalady.
Aqyshevtyń atap ótýinshe, ózge ortalyq bankterge ınflıasııany mundaı aıtarlyqtaı tómendetý úshin uzaq ýaqyt qajet bolar edi. Salystyrý úshin Reseı erkin baǵam rejimine kóshkennen keıin ınflıasııa deńgeıin 10 aıdyń (2015 jyldyń naýryzy – 2016 jyldyń qańtary) ishinde 16,9 paıyzǵa deıin ǵana tómendete aldy. Ázerbaıjanda 2015 jyldyń jeltoqsanyndaǵy devalvasııadan keıin ınflıasııa birjaqty mánge deıin tómendegen joq. Al sońǵy aılarda ósim (2016 jyldyń jeltoqsanynda 15,7 paıyz) kórsetip otyr.
Aıta keteıik, bıyl Qazaqstandaǵy ınflıasııanyń maqsatty dálizi 6-8 paıyz deńgeıinde belgilengen. QR Ulttyq banki baǵalaýynda taıaý 1-2 aıdyń ishinde ınflıasııa atalǵan dáliz sheginde bolady jáne 2017 jyl boıy ekonomıkaǵa tosyn keri áser bolmaǵan jaǵdaıda saqtalady.