Oblys óńirindegi oqý oryndary 25 qańtardaǵy Elbasy Nursultan Nazarbaevtyń Qazaqstan halqyna úndeýin talqylaýdy bastady. Sonyń biri Qostanaı memlekettik pedagogıkalyq ınstıtýtynyń professorlyq ujymy men stýdentteri Qazaqstan Respýblıkasy Prezıdentiniń bılik tarmaqtary arasynda ókilettikterdi qaıta bólý máseleleri jónindegi úndeýine oraı dóńgelek ústel májilisin ótkizdi. Oǵan oblystyq jastar saıasaty basqarmasynyń basshysy Kenesh Álimjanov qatysyp, ol Elbasynyń Qazaqstan halqyna úndeýinde aıtylǵan máseleler elimizdegi demokratııalyq úrdister damýynyń aıǵaǵy ekenin aıtty. Bul Prezıdent ókilettikteriniń Úkimet pen Parlamentke bólinýi azamattyq qoǵamnyń da belsendiligin qajet etedi, al odan jastar tys qalmaýy kerektigin tilge tıek etti.
«Dóńgelek ústel» májilisinde ınstıtýt prorektory Tilegen Ahmetov, saıasattaný ǵylymdarynyń kandıdaty Svetlana Nazarova, fılosofııa ǵylymdarynyń kandıdaty Aıgúl Amantaeva, stýdent Anastasııa Pýshkareva taǵy basqalar shyǵyp sóılep, Elbasy úndeýinde aıtylǵan máselelerdiń der ýaqytynda júrgizilgeli otyrǵan reforma ekenin aıtty.
«Konstıtýsııaǵa, soǵan oraı elimiz zańnamalaryna ózgerister engizetin ýaqyt pisip jetti. Negizinen, bılik tarmaqtaryna beriletin ókilettikter áleýmettik-ekonomıkalyq sıpatta. Olar Úkimetke, bıliktiń jergilikti atqarý organdaryna beriledi. Bul ókilettikter tek qolǵa bılik ustatý emes, eń aldymen jaýapkershilik degen sóz. Al saıası sıpattaǵy ókilettikter Parlamentke beriledi. Bul degen meniń oıymsha saılaýdaǵy básekeni, saılaýshylar belsendiligin arttyrady. Azamattardyń saıası belsendiligin joǵarylatady, zań shyǵarýshy Parlament jaýapkershiligin de nyǵaıta túsedi. Ýaqyt talap etip otyrǵan osy máselelerdi Prezıdent óz Úndeýinde aıtyp berdi. Muny biz qoldaımyz», – dedi qoǵamdyq pánder kafedrasynyń dosenti, saıasattaný ǵylymdarynyń kandıdaty Svetlana Nazarova.
Názıra Járimbetova, «Egemen Qazaqstan»