Áýlıeata óńiri aýyl sharýashylyǵy, óndiris, ónerkásip, kásipkerlik jáne ózge de salalar boıynsha ótken jyldyń naqty qorytyndysyn shyǵardy. Al oblystyń áleýmettik-ekonomıkalyq turaqtylyǵy óz kezeginde óńirdegi kásiporyndardyń, sharýa qojalyqtarynyń jumys qarqynyna tikeleı baılanysty. Osy rette oblys ákimi Kárim Kókirekbaevtyń qatysýymen ákimdik májilisi ótip, kún tártibindegi máseleler qaraldy.
Onda Jambyl oblysy ákimdigi ekonomıka jáne bıýdjetti josparlaý basqarmasynyń basshysy Jomart Ámirhanov ótken jylǵy esepti kezeńde oblystyń ónerkásip kásiporyndarymen 339,1 mıllıard teńgege ónim óndirip, ótken jylmen salystyrǵanda ósim 2,4 paıyzdy quraǵanyn aıtyp ótti. Sondaı-aq, basqarma basshysy ónerkásip salasyndaǵy ósim ken óndirý ónerkásibi jáne karerlerdi qazýda óndiris kólemin 8,0 paıyzǵa (ıaǵnı 38,1 mıllıard teńge), óńdeý ónerkásibinde – 2,5 paıyzǵa (237,1 mlrd. teńge) ulǵaıtý esebinen qamtamasyz etilgenin de habarlady.
Alaıda, aýdandar aralyǵynda ónerkásip óndirisiniń tómendeýine Baızaq jáne Qordaı aýdandarynda jol berilgen. Máselen, Baızaq aýdanynda kórsetkish 12,3 paıyzǵa, al Qordaı aýdanynda 11,2 paıyzǵa tómendegen.
Munyń sebebin basqarma basshysy Baızaq aýdanynda «ROLA-7» JShS-de, shaǵyn jáne qosalqy kásiporyndarda tapsyrystardyń tómendeýine, Qordaı aýdanynda ónimge suranystyń joqtyǵynan «Aqtas» JShS jáne «Úmit-Qordaı» JShS kásiporyndarynyń toqtap turýyna, «Pervomaıskıe delıkatesy» JShS-de tapsyrystyń qysqarýyna baılanysty túsindirdi.
Sondaı-aq, kásipkerlikti qoldaý kartasynyń sheńberinde ótken jyly jalpy quny 20,5 mıllıard teńgege 446 jańa jumys orny qurylǵan, 10 ınvestısııalyq joba iske asyrylǵan. Sonymen qatar, oblysta «Sybaǵa», «Altyn asyq», «Qulan» baǵdarlamalary tıimdi júzege asyrylýda. Osy baǵdarlamalar sheńberinde 5527 bas iri qara mal, 46296 bas qoı, 2165 bas jylqy satyp alynyp, jospar tıisinshe oryndalǵan. О́z sózinde basqarma basshysy ımporttyń tómen, eksporttyń joǵary ekenin de aıtyp ótti. Al oblys ákiminiń óńirimizde «Nurly jol» baǵdarlamasynyń oryndalý barysy týrasyndaǵy saýaldamada basqarma basshysy 99,9 paıyzǵa ıgerilgenin aıtyp, jaýap berdi.
Hamıt ESAMAN,
«Egemen Qazaqstan»
Jambyl oblysy