Ishki ister mınıstrliginde osy organ qyzmetiniń máselesi jónindegi Qoǵamdyq keńestiń kezekti otyrysy ótti. Onyń jumysyna keńes músheleri, Ishki ister mınıstrliginiń basshylyǵy men salalyq qyzmet jetekshileri qatysty.
Atalǵan Qoǵamdyq keńestiń otyrysynda konsýltatıvtik-keńestik organnyń ótken jylǵy atqarǵan jumys nátıjeleri jáne 2017 jyldarǵa arnalǵan jospary talqylandy. Bul oraıda Keńestiń tóraǵasy, professor Marat Qoǵamov budan bylaı turaqty eki komıssııanyń belsendi jumys isteıtinin habarlady. Keńestiń janynan qurylǵan bul komıssııalar azamattardyń quqyqtary men bostandyqtaryna, mindetterine qatysty normatıvtik-quqyqtyq aktilerdiń jobasyn qarastyratyn zań shyǵarýshylyq pen polısııa jumysynyń aıqyndylyǵyn qamtamasyz etetin máselelerdi jáne azamattardyń ótinishterin qaraýdy júzege asyrady.
Bul baǵytta atalǵan Qoǵamdyq keńes ótken jyly segiz otyrys pen úsh qoǵamdyq tyńdaý ótkizdi, onda normatıvtik qujattamalardy ázirleý boıynsha ózekti máseleler qarastyryldy. Keńes 140 zań jobasyn, Úkimettiń qaýlysyn, IIM-niń kelisimderi men buıryqtaryn, azamattardyń quqyqtaryna, bostandyqtary men mindetterine qatysty basqa da normatıvtik-quqyqtyq aktilerdiń qamtamasyz etilýin, sondaı-aq, 40 azamattyń ótinishin qarap, nátıjesin saralady. Onyń qorytyndysy boıynsha, mınıstrliktiń qyzmetterine tıisti usynymdar berildi, olardyń basym bóligi iske asyryldy, qalǵandarynyń oryndalýy baqylaýǵa alyndy.
M.Qoǵamovtyń aıtýyna qaraǵanda, Qoǵamdyq keńes músheleri Parlamentke, memlekettik organdar men óńirlerde ótetin ǵylymı-praktıkalyq konferensııaǵa, dóńgelek ústel jumystaryna, qoǵamdyq kezdesýlerge, kóshpeli otyrystarǵa qatysqan kórinedi.
Jıyn barysynda Ishki ister mınıstri Q.Qasymov sóz alyp, Keńestiń tóraǵasy men múshelerine alǵys bildirip, onyń qoǵamdyq mańyzdy máseleler aıasynda jáne ishki ister organdary qyzmetiniń ashyqtyǵyn qamtamasyz etý máseleleri boıynsha belsendi atqarylǵan jumysty atap ótti.
Sonymen qatar, otyrys barysynda IIM-niń komıtet jáne departament basshylarynyń Qoǵamdyq keńestiń turaqty komıssııasynyń usynymdaryn iske asyrý jáne ishki ister organdary qyzmetiniń ártúrli baǵyttary boıynsha esebi tyńdaldy.
Sóıtip, talqylaý barysynda Keńestiń bıylǵa arnalǵan jumys josparynda aıqyndalǵandaı, qoǵamdyq tyńdaýlardy ótkizý úshin jumys toptaryn bekitý máselesi qaraldy. Osy oraıda «Azamattar jáne polısııa: senimge negizdelgen ózara is-qımyl», «Jınalys, mıtıngter, demonstrasııalar men sherýler», «Qazaqstan polısııasyna – 25 jyl: qalyptasýy, damýy, ozyq tájirıbesi, tıimdilik problemalary» taǵy basqa da taqyryptarǵa mán berý kózdeldi.
Otyrystyń qorytyndysy boıynsha, Qoǵamdyq keńes múshelerine, sondaı-aq, mınıstrliktiń qyzmet basshylaryna osynda qaralǵan máseleler boıynsha tıisti tapsyrmalar berildi.
Aleksandr TASBOLATOV,
«Egemen Qazaqstan»