«Qazaqstan máslıhattary depýtattarynyń birlestigi» respýblıkalyq qoǵamdyq birlestigi bıýrosynyń keńeıtilgen otyrysy bolyp ótti.
Otyrys barysynda Memleket basshysy N.Nazarbaevtyń bılik tarmaqtary arasyndaǵy ókilettikterdi qaıta bólý jónindegi Úndeýi talqylandy.
Jıynǵa qatysýshylar Elbasynyń usynystaryn qoldap, elimizdiń ári qaraıǵy damýynda mundaı sharalardyń mańyzdy oryn alatyndyǵy jóninde biraýyzdy baılamǵa keldi. Talqylaý ústinde keıbir ókilettikterdiń Úkimettiń quzyryna berilýi áleýmettik-ekonomıkalyq mindetterdi tıimdi júzege asyrýǵa qosymsha serpin beretindigi aıtyldy. Úkimet memleket basshysy alǵa qoıǵan strategııalyq mindetterdi tolyq kólemde júzege asyrýǵa, qazirgi zamannyń syn-qaterlerine der kezinde ún qatýǵa, mańyzdy memlekettik baǵdarlamalardyń oryndalýyn baqylaýdy qamtamasyz etýge qabiletti bolmaq.
Talqylaý kezinde halyq úshin mańyzdy sheshimderdi ázirleý men qabyldaý jolynda barlyq deńgeıdegi máslıhattardyń qyzmetin odan ári damytý máselelerine de tıisinshe kóńil bólindi.
Otyrysta sóz sóılegender Memleket basshysynyń Úndeýi eldiń damýyndaǵy jańa kezeńge jol ashatyn, halyqtyń ál-aýqatyn jaqsartýǵa baǵyttalǵan mańyzdy qadam ekendigin aıryqsha atady.
Bıýronyń keńeıtilgen otyrysynyń qorytyndysy boıynsha barlyq deńgeıdegi máslıhattar depýtattarynyń saılaýshylarmen kezdesý uıymdastyryp, konstıtýsııalyq reformalar baǵdarlamasyna qatysty keńinen túsindirý jumystaryn júrgizýge jáne usynystar jınaqtaýǵa sheshim qabyldandy.
Ashat RAIQUL,
«Egemen Qazaqstan»