Fransııanyń kýrortty shahary Albıezden jaǵymdy jańalyq jetti Altaıǵa. On bes jastaǵy óskemendik boıjetken Aıaýlym Ámirenova frıstaıldyń mogýl túrinen ótken Eýropa kýbogynyń birinshi kezeńinde 3-shi, juptasyp óner kórsetýden saıysqa túsken ekinshi kezeńde 2-oryndy ıelendi. Qazir eki kezeń boıynsha sátti syrǵanaǵan qazaq qyzy reıtıngte kósh bastap, úzdikterge beriletin sary jeıdeni kıipti.
- Bul – Aıaýlymnyń sporttaǵy alǵashqy úlken jetistigi. Qýanyshtan júregimiz jarylardaı bolyp tur. Árıne, el ishindegi jarystarda top jaryp júrgenimen, shet elde ótetin úlken dúbirli dodalarda júldege iliný ońaı sharýa emes. Buǵan deıin qyzymyz eki-úsh márte Eýropa kýbogyna qatysyp, birde 10, birde 8-oryndardy ıelenip júrdi. Eń joǵarǵy jetistigi - 6-oryn. Bul jolǵy jarystyń birinshi kezeńinde 1-oryndy Norvegııa, 2-oryndy Brıtanııa sportshylary alǵan eken. On alty memleketten qatysqan jıyrma tórt qyzdyń ishinen 3-orynnan kóriný úlken jetistik dep oılaımyn. Bolashaǵy áli alda ǵoı, - deıdi anasy Gaýharııa Sabıldına.
Kári qurlyqta ótken dúbirli dodaǵa О́skemennen Aıaýlymmen birge eki sportshy qatysqan kórinedi. 18 jastaǵy Oleg Sınn birinshi kezeńde 6-orynǵa taban tirepti.
Elimizdiń birneshe dúrkin chempıony, jastar arasyndaǵy spartakıadanyń jeńimpazy atanǵan óskemendik boıjetken qazirgi ýaqytta aqpan aıynda Japonııanyń Sapporo qalasynda ótetin Azıada oıyndaryna qatysýǵa ázirlenip jatqan kórinedi. Bir aıta keterligi, bul saıysta frıstaıldyń mogýl túrinen qazaq qyzdary arasynan jalǵyz Aıaýlym ǵana el namysyn qorǵaıtyn bolady.
Internettiń zamany ǵoı qazir. Aıaýlymmen telefon arqyly tildese almasaq ta, ata-anasynyń ruqsatymen whatsapp jelisi arqyly sóılesýdiń sáti tústi.
«Jarys qalaısha ótti? Kóńil-kúıiń qalaı?» degen saýalymyzǵa: «Jarys qıyn da, ońaı da bolǵan joq. Basynda qatty ýaıymdap edim. 3-oryn alǵanymdy estigende sener-senbesimdi bilmedim. Ekinshi kezeń de men úshin sátti boldy. О́te qýanyshtymyn» dep jaýap jazypty Aıaýlym.
Azamat Qasym, «Egemen Qazaqstan»
О́skemen