Ońtústik Qazaqstan oblysynyń ákimi Janseıit Túımebaev Saýd Arabııasy Koroldiginiń - Sheıhy, «AL Ramez Group» kompanııasynyń prezıdenti Abdýlla Zaıd ál-Meleıhımen kezdesti. Jıyn barysynda birlesken ınvestısııalyq jobalardy júzege asyrýda eki jaqtyń ókilettigi men mindetterin talqylaýmen konstrýktıvti dıalog ótkizildi. Bul týraly OQO ákimdiginiń baspasóz qyzmeti habarlady.
Áńgime barysynda taraptar Ońtústik Qazaqstan men Saýd Arabııasynyń ózara qarym-qatynasyn jańa deńgeıge kóterý qajettigin atap ótti.
«Biz ekonomıkany ártaraptandyrýǵa baǵyttalǵan reformalardy iske asyrýdamyz. Ońtústik Qazaqstan oblysy - respýblıkadaǵy ónerkásip pen aýyl sharýashylyǵynyń barlyq salalary damyǵan óńir. Kásipkerlikti qoldaý úshin bızneske barynsha jeńildikter qarastyryp, ınvestısııa tartý úshin qolaıly jaǵdaılar jasalýda. Bıznes úshin ákimshilik kedergiler meılinshe azaıtyldy. Qazir bizde 3 arnaıy ekonomıkalyq aımaq qurylyp, onda lıberaldy salyq rejimi qoldanyla otyryp jumys júrgizilýde», - dedi aımaq basshysy Janseıit Túımebaev.
О́z kezeginde Sheıh- Abdýlla Zaıd ál-Meleıhı Qazaqstan men Saýd Arabııasy arasyndaǵy iskerlik baılanystardyń keleshegi zor ekenine nazar aýdardy. Onyń aıtýynsha, munda jumys isteýge, saýda-sattyq jasaýǵa jaqsy jaǵdaı jasalǵan. Ásirese, Qazaqstannyń saıası turaqtylyǵy, ishki tatýlyǵy ınvestorlar úshin erkin jumys isteýge múmkindik beredi. Budan bólek, saýdııalyq iri kompanııa basshysy Ońtústik Qazaqstannyń búgingi tynys-tirshiligimen tolyqtaı tanysyp, Túlkibas aýdanynan jylyna 30 myń tonna et beretin qus fabrıkasynyń qurylysyn bıylǵy naýryz aıynda bastaıtyndaryn jetkizdi.
Jalpy quny 85 mln eýrony quraıtyn joba eki kezeń boıynsha júzege asyrylady. Alǵashqysyna 61 mln eýro josparlansa, ekinshi kezeń úshin 24 mln eýro qarastyrylypty. Jobany júzege asyrý barysynda balapan asyraý oryndary, analyq jáne balapan ósirý oryndary salyndy. Budan bólek ınkýbator, broılerlik korpýs, soıý sehi jáne jem-shóp zaýyty boı kóterdi.