Bas prokýratýranyń janyndaǵy Quqyq qorǵaý organdarynyń akademııasynda quqyq qorǵaý organdary basshylyǵynyń prezıdenttik rezervinde turǵan qyzmetkerlerdiń kásibı deńgeıin arttyrýdyń kezekti kýrstarynyń ashylýy ótti, dep habarlady vedomstvonyń baspasóz qyzmeti.
«Bul kýrstarǵa tyńdaýshylar retinde prokýratýra men ishki ister organdarynyń ortalyq apparaty men oblystyq bólimshelerinde basshylyq laýazymdaǵy qyzmetkerleri qatysady. Oqytýdyń negizgi maqstaty – tyńdaýshylardyń basshylyq qyzmetke taǵaıyndalýy úshin qajetti kásibı daǵdylary men basqarý quzyretin jetildirý», - delingen habarlamada.
Akademııa rektory Ulan Baıjanov is-sharany asha otyryp, rezervısterdi bolashaqta budan da jaýapty basshylyq qyzmetke daıarlaýda oqytý kýrstarynyń mańyzdylyǵy men praktıkalyq paıdalylyǵyn atap ótti.
U.Baıjanov aıtyp ótkendeı, Memleket basshysy qoǵam talaptary men joǵary halyqaralyq standarttarǵa jaýap beretin quqyq qorǵaý júıesin qurý mindetin alǵa qoıdy. Bul úshin elimizge jańa formasııanyń basshylary, ıaǵnı, bilimdi, adamgershilik qasıetteri joǵary ári adamdardyń seniminen shyǵatyn basshylar qajet. О́z kezeginde Akademııa Prezıdenttik rezervte turǵan kadrlardy arnaıy daıarlaýdyń júıesin júzege asyryp jatyr. О́tken jyly Prezıdenttik rezervti daıarlaý kýrstarynan pokýratýra, ishki ister organdary, ekonomıkalyq tergep-tekserý jáne sybaılas jemqorlyqqa qarsy kúres qyzmetteriniń 45 qyzmetkeri ótti, olardyń 9-y basshylyq qyzmetke taǵaıyndaldy, - dep atap ótti rektor.
Oqytýdy joǵarǵy deńgeıde ótkizý úshin aldyńǵy kýrstardy uıymdastyrý kezinde alynǵan tájirıbeni eskere otyryp, arnaıy oqý baǵdarlamasy ázirlendi. Alǵash ret oqý prosesine basshylyq qyzmettegi analıtıkalyq jumys negizderi boıynsha jańa modýl engizildi. Ol qyzmet babyndaǵy mindetterdi sheshý kezinde analıtıkalyq qabiletti jetildirýge baǵyttalǵan. Sondaı-aq Bas Prokýordyń tapsyrmasyn oryndaý aıasynda basqarýdyń transformasııasy máseleleri boıynsha trenıngter engizildi (Change programme).
Jalpy alǵanda oqytý prosesi qalypty jáne krızıstik jaǵdaılarda ujymdy tıimdi basqarýdyń (HR-menedjment) kásibı daǵdylaryn damytýǵa jáne jetildirýge baǵyttalǵan. Sonymen qatar kýrs taqyryby strategııalyq ári memleketimiz úshin ózekti ulttyq qaýipsizdikti qamtamasyz etý, terrorızm jáne ekstremızmge, sybaılas jemqorlyqqa qarsy kúres máselelerine arnalǵan.
Jospar boıynsha kýrs uzaqtyǵy bir aıǵa sozylady jáne ol 145 akademııalyq saǵatty quraıdy. Olardyń negizgi bóligi keıstik tapsyrmalardy sheshýge jáne quqyq qorǵaý qyzmetine meılinshe jaqyndatylǵan jobalardy jasaýǵa arnalatyn bolady.
Jınalǵandardy kýrs baǵdarlamasynyń erekshelikterimen tanystyryp ótip, Ulan Baıjanov barlyq tyńdaýshylardy nátıjeli jumys jasaýǵa shaqyrdy.
Oqytý kýrstaryn uıymdastyrýǵa Eýropalyq Odaqtyń "Qazaqstandaǵy qylmystyq sot tóreligin jetildirý" jobasynyń qatysýshylary, memlekettik organdar men elimizdiń jetekshi ǵylymı-bilim berýshi mekemeleri belsendi kómek kórsetýde.