Memleket basshysy Nursultan Nazarbaev arnaıy málimdeme jasap, erteń jarııa bolatyn Joldaýdyń negizgi taqyryby týraly aıtty.
«Qurmetti qazaqstandyqtar! Qasıetti otanymyz táýelsizdiktiń úshinshi músheline aıaq basty. Qazaqstan qysqa merzim ishinde kemeldenip, qýaty tolysqan saqa memleketke aınaldy. Shırek ǵasyrda elimizdi túbegeıli ózgertken eki jańǵyrýdy iske asyrdyq. Aldymen naryqtyq ekonomıka qaǵıdalaryna negizdelgen múldem jańa sıpatty memleket qurdyq. Ekinshiden, Qazaqstan-2030 strategııasyn júzege asyryp, asqaq astanamyzdy saldyq. Al qazir kezekti mańyzdy belestiń aldynda turmyz.
Erteń qańtardyń 31-inde meniń halyqqa Joldaýym aqparat quraldarynda jarııalanady. Men bıylǵy joldaýymda el damýyna tyń qarqyn beretin jańa baǵdardy usynbaqpyn. Basty taqyryp «Qazaqstannyń úshinshi jańǵyrýy. Ol elimizdiń ekonomıkalyq damýynyń ınnovasııalyq ózegine aınalyp, básekege qabiletin arttyra túsýi tıis. Biz sandyq tehnologııalarǵa negizdelgen bolashaǵy zor baǵyttarǵa aıryqsha mán beretin bolamyz. Al bilim berý, densaýlyq saqtaý, halyqty áleýmettik qorǵaý jáne baspanamen qamtamasyz etý sııaqty mańyzdy salalar qashanda basty nazarda qala bermek» dedi Nursultan Nazarbaev.
Elbasy zańǵa sáıkes, Prezıdenttiń joldaýdy aýyzsha jáne jazbasha túrde jasaýyna bolatynyn, óziniń bıyl ekinshi jolyn tańdaǵanyn aıtty.