Almatydaǵy Ortalyq mýzeıde XXVIII Dúnıejúzilik qysqy Ýnıversıada aıasynda «Qazaqstan sportynyń tarıhy» atty kórme kelýshilerge esik ashty.
Kórmeniń ashylý saltanatyna Olımpıada chempıony Jaqsylyq Úshkempirov, KSRO-nyń eńbek sińirgen jattyqtyrýshysy Hvan Maı Ýndeevıch, sambodan halyqaralyq dárejedegi tóreshi Mıhaıl Shepetıýk syndy sport ardagerleri, tanymal jas sportshylar men Qazaq sport jáne týrızm akademııasynyń ókilderi qatysty.
Memlekettik ortalyq murajaı dırektorynyń birinshi orynbasary Beıbitqalı Qaqabaev óz sózinde atalǵan kórmeniń Almaty qalasyndaǵy orta mektepter úshin Qazaqstan sportynyń tarıhymen tanystyrýǵa baǵyttalǵan tanymdyq baǵdarlama ekenin jetkizdi.
Murajaıdyń qor bóliminde saqtalǵan sporttyq toptamalar men qujattar negizinde Qazaqstandaǵy sport túrleriniń, onyń ishinde ulttyq sporttyń damý tarıhy baıandalady. Eki bólimnen turatyn «Qazaqstan sportynyń tarıhy» atty kórmede qujattar, fotosýretter, zattyq eksponattar, arnaıy sport kıimderi, emblemalar, kádesyı buıymdary, sporttyq aqparattar hronologııalyq túrde ret-retimen qoıylǵan.
1943 jyly ótken Ortalyq Azııa jáne Qazaqstan respýblıkalarynyń spartakıadasyna arnap jasalǵan muqabasy aǵash alyp albom, Qajymuqan balýan kıgen tymaq tárizdi biregeı eksponattarmen qatar, Azııa oıyndaryna qatysqan qazaqstandyq sportshylar kıgen formalar da kelýshiler nazaryna usynylypty.
Keńes Odaǵy tusynda túrli sporttyq dárejelerge qol jetkizip, el maqtanyshyna aınalǵan jerlesterimiz Ǵusman Qosanov, Evgenıı Iаrovenko, Áljan Jarmuhamedov, Nellı Kım, Jaqsylyq Úshkempirov, Shámil Serikov, Amanjol Buǵybaev, Qabden Baıdosov, Anatolıı Hrapatyı, Hvan Maı Ýndeevıch, Qazbek Ýálıev, Serik Qonaqbaev syndy áıgili sportshylardan bastap, kúni keshe Sıdneı, Afına, Beıjiń, London qalalarynda ótken olımpııa oıyndarynda el namysyn qoldan bermeı, kók baıraǵymyzdy jelbiretken otandastarymyzdyń tolaıym tabystary men marapattaryn kórmeden kórip qaıtqan kez kelgen jastyń sportqa degen qyzyǵýshylyǵy arta túspese, kemimesi anyq.
Ulttyq jáne halyqaralyq sporttyń damýyna zor úles qosqan sportshylardy, sonymen qatar, elimizdiń sport salasynda qol jetkizgen tabystaryn óskeleń urpaqqa tanystyrýdy maqsat etken bul kórme eki aıǵa sozylmaq.
Mıra BAIBEK,
«Egemen Qazaqstan»
ALMATY