"SNPS-Aqtóbemunaıgaz" AQ bas dırektory Van Szıýnjen oblys ákimi Berdibek Saparbaevtyń tóraǵalyǵymen ótken jınalysta kásiporyn qyzmetiniń negizgi qorytyndylarymen tanystyrdy, sonymen birge 2016 jyly kompanııa aldynda kóptegen qıyndyqtar týyndaǵanyn da atap kórsetti, dep habarlady oblys ákimdiginiń baspasóz qyzmeti.
«Munaı baǵasy barynsha tómendedi, eski ken oryndary boıynsha ónim óndirýdiń tabıǵı taýsylýy baıqaldy. Oblys ákimdigi men memlekettik organdardyń jan-jaqty qoldaýy nátıjesinde biz qıyndyqtarǵa qarsy turyp, ónim óndirý boıynsha barlyq kórsetkishterdi artyǵymen oryndaýǵa qol jetkizdik», - dedi ol.
"2016 jyly 4 mln 121 myń tonna munaı, 5 mıllıard 759 myń tekshe metr gaz óndirildi. Qazaqstandyq munaı óńdeý zaýyttaryna ótkiziletin shıkizattyń jalpy kóleminiń 50 paıyzy berildi, ishki naryqqa 470 myń tonnadan astam suıytylǵan gaz shyǵaryldy. Tutastaı alǵanda gaz ótkizý kólemi 5 mıllıard qurady, osylaısha biz kompanııanyń tarıhynda rekordtyq kórsetkishke qol jetkizdik", - dep habarlady Van Szıýnjen.
Bas dırektor sondaı-aq AQ ózderine qabyldaǵan barlyq mindettemelerin oryndaǵanyn atap kórsetti: ishki naryqqa 30 mıllıard teńgeniń munaıyn, suıytylǵan gazyn jáne tabıǵı gazyn ótkizip, salyqqa 83,5 mıllıard teńge aýdarylǵan. Jumysshylardy tegin tamaqtandyrýǵa 769 mıllıon teńge bólinip, bir jumysshyǵa beriletin áleýmettik paket 231 myń teńge quraǵan.