L.N.Gýmılev atyndaǵy Eýrazııa ulttyq ýnıversıtetinde Astana qalasy Qazaqstan halqy Assambleıasynyń qoǵamdyq qurylymdary men eldegi etnomádenı birlestikterdiń ókilderi «Jas Otan» jastar qanatynyń múshelerimen kezdesti.
Sharaǵa Parlament Májilisiniń depýtattary, Qazaqstan halqy Assambleıasy Qoǵamdyq kelisim keńesteriniń músheleri, jastar uıymdarynyń jetekshileri, sarapshylar qatysty.
Kezdesý barysynda Elbasynyń «Qazaqstannyń Úshinshi jańǵyrýy: jahandyq básekege qabilettilik» atty Qazaqstan halqyna Joldaýy, sondaı-aq, Memleket basshysynyń konstıtýsııalyq reformasy boıynsha usynystar ázirleý máselesi talqylandy.
Sharaǵa qatysýshylar saıası júıeni jańǵyrtý – bul memlekettilikti nyǵaıtý, bıliktiń úsh tarmaǵynyń ózara ońtaıly is-qımyl jasaýy jáne olardyń árqaısysynyń jaýapkershiligin arttyrý arqyly júzege asatyn úderis ekenin jetkizdi. Sonymen qatar, olar memlekettik bılik júıesin reformalaý úshin Bes ınstıtýttyq reformany iske asyrýǵa qolaıly jaǵdaılardy qamtamasyz etýge mán berý qajettigine toqtaldy.
Bul kúngi jıyn aıasynda Úkimettiń jáne atqarýshy bıliktiń Parlament pen jergilikti ókiletti organdardyń aldynda esep berý tetigin kúsheıtý máselesi qaralyp, bul óz kezeginde Qazaqstandy demokratııa jolynda odan ári senimdi túrde ilgeriletý boıynsha jasalatyn oń qadam ekeni aıtyldy. Sondaı-aq, jalpy, memlekettik bılik júıesine jasalatyn reformanyń negizinde qazirgi zamannyń jahandyq jáne óńirlik syn-qaterleriniń aldyn alý joldary qarastyrylatynyna nazar aýdaryldy.
Láıla EDILQYZY,
«Egemen Qazaqstan»