Úıinde "Balapan" arnasy qosylyp turǵan aǵaıyn bilýi kerek. Kúnde keshkilik "Jolaýshy men tasbaqa" degen ertegi oqylady. Oıy oramdy, tili jeńil, bala sanasyna óte yńǵaıly etip jazylǵan osy ertegini on jastaǵy oqýshy qyz jazǵan. Jeti jasynan bastap qolyna qalam alyp, ertegi qurastyryp, óleń shyǵaryp, erekshe darynymen kózge túsken Altynaı Berik Qyzylordadaǵy №267 mekteptiń 5-synyp oqýshysy.
Altynaıdyń ertegi jazý stıli de bólek. Aldymen sýret salady. Sosyn salynǵan sýrettiń jelisi boıynsha ertegi qurastyrady. Sodan soń úıdegi ózinen bólek alty balany aınalasyna jınap alyp, jańa jazǵan týyndysyn oqyp beredi. Ǵajap qoı, ıá?!
– «Ulan», «Baldyrǵan», «Aq jelken», «Móldir bulaq», «Ertegiler elinde» sekildi gazet-jýrnaldarǵa Altynaıdyń jazǵan dúnıelerin únemi joldap turamyz. Jibergen shyǵarmalarymyzdyń barlyǵy redaksııalanbaı, qalam tımeı, sol kúıinde jaryq kóredi. Olardan kelgen hatta qyzymyzdyń talantty ekeni, jazýy óte jaqsy ekeni aıtylady. «Balapan» arnasynyń 5-jyldyq mereıtoıynda ertegiler saıysy uıymdastyrylǵan. Sonda Altynaıdyń «Uqpasqa aıtqan sóz jetim» atty ertegisi úzdikter qatarynan tabylyp, eń jas avtor retinde «Meniń ǵajaıyp ertegim» degen kitapqa endi,– deıdi ertegishi qyzdyń ájesi Sholpan Sháripbaıqyzy.
Jaqynda ǵana «Balapan» arnasy Altynaıdyń taǵy da úsh ertegisin attaı qalap alǵan. Aldaǵy ýaqytta qazaqstandyq balalar onyń «Túıe», «Qamqorlyq», «Naýryz» atty shyǵarmalaryn arnadan tyńdaıtyn bolady. Shynashaqtaı qyzdyń óleń jazatynyn da aıttyq. Byltyrǵy Konstıtýsııa kúninde Altynaı óleń shyǵaryp, oǵan izgi tilegin qosyp, Elbasynyń atyna hat joldady. Memleket basshysy oqýshynyń hatyn úlken yjdahattylyqpen oqyp, tanysypty. «Bolam degen balanyń betin qaqpa, belin bý» degen ejelgi qaǵıdamen Nursultan Nazarbaev Altynaıǵa óziniń «Eýrazııa júreginde» atty kitabyn syıǵa tartqan. «Aınalaıyn Altynaı! Talabyńa nur jaýsyn! Jaqsy oqyp, aqyldy, bilimdi, ónerli qyz bolyp ós» degen atalyq tilegin qosa jazyp jibergen.
Altynaı sekildi tabıǵatynan talantty jastarǵa qamqorlyq ta erekshe bolýy kerek. Muny aıtyp otyrǵanymyz, óz qatarlastarynan daralanyp turǵan qyzdyń búginde qyryqtan astam ertegisi bar. Onyń syrtynda óleńderi men áńgimeleri bir bólek. Olardy kitap etip bastyryp, jurtshylyqqa keńinen tartsa, paıdasy mol bolaryna senemiz. Ákesi qarapaıym jumysshy, anasy jeti balanyń tárbıesimen úıde otyrǵan otbasynyń buǵan shamasy kelmeıdi, árıne. Sondyqtan, «bulaq kórseń, kózin ash» degen prınsıpti ustanǵan azamattar Altynaıǵa kómektesse, balalar ádebıetine ǵana emes, óz balasynyń tárbıesine de erekshe úles qosqan bolar edi-aý...
Erjan BAITILES, «Egemen Qazaqstan»
QYZYLORDA