Syr marjany shetelde joǵary suranysqa ıe. Bul týraly Qyzylorda oblysynyń ákimi Qyrymbek Kósherbaev turǵyndarmen esepti kezdesýinde baıandady.
Ákimniń aıtýynsha, Turaqty damý tendensııasy agroónerkásip sektorynda da baıqalady. 2016 jyly aýyl sharýashylyǵy salasynda negizgi kapıtalǵa salynǵan ınvestısııa kólemi 2015 jylmen salystyrǵanda 2 eseden artyq ósti. Budan bólek, Táýelsizdigimizdiń 25 jyldyǵy mereıli merekesi qarsańynda Syr kúrishshileri el tarıhynda kúrishtiń ár gektarynan 56 sentner, al, jekelegen sharýashylyqtar 80 sentnerge deıin ónim jınap, rekordtyq kórsetkishke qol jetkizdi.
- Sońǵy 3 jylda kúrishtiń jalpy jıyntyq ónimi úshten bir bólikke kóbeıdi (32 paıyz), buǵan daqyl kólemin ulǵaıtýdan emes, qaıta kúrish sorttarynyń ónimdiligin arttyrý esebinen qol jetip otyr. Biz oblys tarıhynda alǵash ret aýyl sharýashylyǵy ónimderin taratý naryǵyna keshendi marketıngtik zertteýler júrgizip jáne ony agrarlyq sektordyń múmkindik áleýetterimen baılanystyrdyq. Osy zertteýlerdiń negizinde oblystyń 2020 jylǵa deıingi agroónerkásiptik keshenin damytýdyń agrokartasy jasaldy,- dedi oblys ákimi kezdesý barysynda.
Oblysta aýyl sharýashylyǵyn damytýdyń 2020 jylǵa deıingi Agrokartasynda negizgi mindet retinde eksporttyq áleýetti arttyrý aıqyndalyp, ónimderdi taratý naryǵyn keńeıtý arqyly Parsy shyǵanaǵy elderine (Iran, Birikken Arab Ámirlikteri), Ortalyq Azııaǵa (Qytaı) jáne Shyǵys Eýropaǵa shyǵý kózdelgen.
- Alǵashqy kezekte biz negizgi daqylymyz kúrish úshin jańa naryqtardy ıgere bastadyq. Qazir Qytaıǵa 20 myń tonna kúrish jóneltý boıynsha kelissózder júrgizilýde, Túrkııa men Anglııaǵa kúrish ótkizý máseleleri qarastyrylýda. Embargo alynǵannan keıin bizge Irannyń úlken rynogyna jol ashyldy. Bul memleket jyl saıyn 5 mln tonnaǵa deıin kúrish tutynady, onyń teń jartysyn syrttan tasymaldaıdy. Osy naryqty ıgerý maqsatynda 2016 jyly Iran elinde úlken suranysqa ıe «Torom Hoshemı» kúrish sortyn tájirıbelik negizde ósirdik. Iran kásipkerleri bizden kúrish satyp alatyn boldy, tipti, óndiristi qarjylandyrýǵa ázir ekenderin bildirdi. Bul jóninde biz 1 aqpanda Mazandaran provınsııasynyń basshylyǵymen bolǵan kezdesý barysynda kelisimge keldik,- dedi oblys ákimi.