Kezdesý barysynda Qazaqstan Prezıdentine 2016 jyldyń qorytyndysy boıynsha Aqtóbe oblysynyń áleýmettik-ekonomıkalyq damýy jóninde baıandaldy.
Elbasy Aqtóbe oblysy perspektıvaly ónerkásiptik óńir bolyp sanalatynyn, degenmen elimizdiń ishki jalpy ónimine qosatyn oblystyń ekonomıkalyq úlesi jyldan jylǵa azaıyp kele jatqanyn aıtty.
"Mundaı úrdis 2012 jyldan beri jalǵasýda. Biz onyń sebepterin anyqtap, tıisti sharalar qabyldaýymyz kerek. Eger de aýyl sharýashylyǵy eksportyn arttyramyz desek, qaıta óńdeý óndirisi nysandaryn damytýǵa mán berý qajet," – dedi Nursultan Nazarbaev.
Memleket basshysy shaǵyn jáne orta bıznesti damytyp, onyń óńir ekonomıkasyndaǵy úlesin 50%-ǵa jetkizýdiń mańyzdylyǵyna nazar aýdardy.
Sondaı-aq, Qazaqstan Prezıdenti oblystyń áleýmettik saladaǵy jumysynyń basymdyǵy bar baǵyttaryn belgilep berdi. Sonyń qatarynda balabaqsha sanyn kóbeıtý, apatty jaǵdaıda turǵan mektepterge jóndeý jumystaryn júrgizý, buǵan qosa birqatar bilim berý mekemelerindegi úshinshi aýysymdy joıý máseleleri bar.
Aqtóbe oblysynyń ákimi óńirdiń ekonomıkalyq jaǵdaıyn jaqsartý, sonyń ishinde ónerkásip sektoryn damytý, aýyl sharýashylyǵyna ınvestısııa tartý jáne halyqty jumyspen qamtý maqsatymen júrgizilgen jumystar týraly aıtyp berdi.
"Jyl qorytyndysy boıynsha oblystyń áleýmettik-ekonomıkalyq damýynyń negizgi kórsetkishteri óskeni baıqalady. Eń bastysy – jumyssyzdyqtyń kóbeıýine jol bergen joqpyz. Memlekettik baǵdarlamalardyń der kezinde júzege asyrylýy nátıjesinde byltyr 16 myń jańa jumys orny ashyldy," – dedi B.Saparbaev.
Kezdesý sońynda Elbasy birqatar naqty tapsyrma berdi.