Búgin Almaty oblysynyń ákimi Amandyq Batalovtyń tóraǵalyǵymen oblystyq aktıvtiń otyrysy ótti. Jıynda Bas prokýrordyń orynbasary Erlik Kenenbaev oblys aktıvine Almaty oblysynyń jańa prokýrory Azamat Jylqybaevty tanystyrdy, dep habarlaıdy QazAqparat.
Almaty oblysynyń ákimi Amandyq Batalov birinshi kezekte Almaty oblysynyń prokýrory bolǵan Ǵabıt Mırazovtyń 5 jylda atqarǵan jumysyna oń baǵa berip, ortaq múddege jetý maqsatynda birlese atqarǵan eńbegi úshin alǵysyn bildirdi.
Otyrys barysynda Erlik Ábdiraqymuly jańadan taǵaıyndalǵan oblys prokýrorynyń iskerlik, kásibı jáne adamı qasıetterine jekeleı toqtalyp, onyń prokýratýra salasynda uzaq jyldar boıy eńbek ótiliniń baryn jáne bul laýazymdy alyp júrýine tolyqtaı bilimi men biliktiliginiń jetetindigin atap ótti.
Azamat Jylqybaev 1998-1999 jyldary Almaty prokýratýrasynda bas maman bolyp jumys istegen. Ár jyldary Almaty qalasyndaǵy Jetisý aýdanyndaǵy avıasııalyq kólik prokýratýrasynda prokýror orynbasary qyzmetterin atqardy.
Osy ýaqytqa deıin Almaty oblysy prokýrorynyń birinshi orynbasary bolǵan.
Aıta keteıik, buǵan deıin Almaty oblysynyń prokýrory qyzmetin atqarǵan Ǵabıt Mırazov Almaty qalasynyń prokýrory bolyp taǵaıyndaldy.