Mádenıetter jaqyndasýynyń Halyqaralyq onjyldyǵy aıasynda mádenı, rýhanı muralardy, kitaptardy dáripteýdi basty maqsat tutqan «Kitap – halyqtar dostyǵynyń uıytqysy» atty aksııa barysyn akademııalyq kitaphanaǵa shet el elshileri óz memleketteriniń mádenıeti men rýhanııaty týrasyndaǵy kitaptaryn syıǵa tartty. «Ulttyq akademııalyq kitaphana» respýblıkalyq memlekettik mekemesiniń dırektory Úmithan Muńalbaeva óz elderindegi kitaphanalardan Qazaqstannyń mádenıeti men rýhanııatynan syr shertetin kitap buryshyn ashqan elshilerge zor alǵysyn bildirdi. «Kóp ultty memleketpiz, árbir damýshy memleketterdiń kitaptary bizdiń kitaphanamyzdan oryn alsa nur ústine nur bolmaq. Bizdiń oqyrmandar shetel ádebıeti, mádenıeti týraly tereńirek bilgisi keledi. Osyǵan baılanysty kóptegen elderdiń kitaphanalarymen baılanysymyz bar», deıdi Úmithan Muńalbaeva.
Germanııa Federatıvtik Respýblıkasynyń Qazaqstandaǵy Tótenshe jáne ókiletti elshisi Rolf Mafael myrza Geteni qazaqsha sóıletken uly Abaıdyń ózi eki eldiń arasyna dostyq kópir salyp ketken dese, Makedonııa Respýblıkasynyń Tótenshe jáne ókiletti elshisi Ilııa Psaltırov myrza ótken jyldyń qyrkúıek aıynda Býdapeshttegi Abaıǵa qoıylǵan eskertkishti kórgenin jáne búginde vengr ertegileriniń qazaq tiline aýdarylyp jatqanyn qýanyshpen jetkizdi. Al, Italııa elshiligi mıssııasy basshysynyń orynbasary Matteo Petrını 2015 jyly Mılanda «EHRO-2015» kórmesiniń ótkenin jáne eń belsendilik tanytqan memleketterdiń biri Qazaqstan ekenin aıtyp, eki el arasyndaǵy rýhanı baılanys jyldan-jylǵa nyǵaıa beretinine senim bildirdi.
Rýhanı álemniń qaınar kózi sanalatyn kitaphanada ótken bul kezdesý sońynda nemister qoǵamynyń «Vıdergebýrt», «Shpette blıýmen» ansamblderi ulttyq naqyshtaǵy áýenderin shyrqady.
Oralhan DÁÝIT, «Egemen Qazaqstan»
ASTANA