«Qazposhta» AQ-tyń zaman talaptaryna saı poshta bólimshesi aýdan ortalyǵy – Ertis aýylynda ashyldy.
Aýdan ortalyǵynyń turǵyndary zamanaýı tehnologııamen jabdyqtalyp, halyqqa sapaly, tıimdi qyzmet kórsetetin poshta bólimshesiniń ashylǵanyna qýanyshty. Bul – aýyl halqyna da sapaly, tıimdi qyzmet kórsetýdiń zamanaýı órkenıetti úlgisi jetti degen sóz. Bólimshe birneshe zalǵa bólingen: poshtalyq jáne qarjylyq qyzmetter, árbir adamǵa arnalǵan oryndar, korporatıvtik klıentterge qyzmet kórsetý orny, sálemdemeler sýpermarketi bar. Poshta bólimshesinde zeınetaqydan basqa, ataýly áleýmettik kómekti, jalaqyny alýǵa, kommýnaldyq, salyq jáne basqa tólemderdi júzege asyrýǵa, gazet-jýrnaldarǵa jazylýǵa bolady.
Al aýyl turǵyny óz atyna kelgen sálemdemesin alý úshin termınaldyń ekranyna uıaly telefonnyń nómirin jazyp, qatary men jáshiktiń nómiri belgilengen talondy alady. Talon arqyly sálemdemesin taýyp, jeke kýáligi arqyly kassaǵa keledi. Osy júıe arqyly 2 mınýt ishinde sálemdemesin ala alady.
− Bul poshta qyzmetine engizilgen zamanaýı qurylǵylar men jańa qyzmet túrleriniń arqasynda múmkin bolyp otyr. Jańashyldyq aýyldarǵa da jetti. Elimizdiń poshta qyzmetinde gıbrıdtik elektrondy poshta, Postmarket.kz saýda alańy, postamat termınaly, mobıldik qozǵalmaly qurylǵy sııaqty órkenıetti jańa jobalar qosylýda, − deıdi «Qazposhta» AQ oblystyq fılıalynyń basshysy Qaırat Bekenov.
Sonymen birge, aýdandyq poshta bólimshesine VAZ-2329 avtokóligi berildi. Endi aýdannan shalǵaı ornalasqan aýyldarǵa hat-habar, gazet-jýrnaldar jyldam jetkiziletin bolady.
Farıda BYQAI, «Egemen Qazaqstan»
Pavlodar oblysy,
Ertis aýdany