Aqpan aıynyń 19-26 aralyǵynda Japonııanyń Sapporo qalasynda VIII qysqy Azııa oıyndary ótedi. Dúbirli dodaǵa qatysatyn Qazaqstannyń sporttyq delegasııasy Kúnshyǵys eline attanyp ketti.
Jaqynda sportshylardy Almaty qalasynda shyǵaryp salý rásimi ótti. Osydan úsh jyl buryn Sochı Olımpıadasynda Qazaqstannyń týyn ustap shyqqan shańǵyshy Erdos Ahmadıevke bul joly da senim artylyp otyr.
Almatyda ótken shyǵaryp salý rásiminde jelaıaq shańǵyshy sportshylary atynan Ant mátinin oqyp, baıraqty básekede el namysyn laıyqty qorǵaýǵa ýáde berdi.
Sapporoda qysqy sporttyń 11 túrinen 64 medal jıyntyǵy sarapqa salynady. Qazaqstannyń sporttyq delegasııasy osy oıyndarǵa keıbir sport túrleri boıynsha ekinshi qurammen barady. Onyń ózindik sebepteri bar. Jaqynda elimizdiń negizgi quramy Almatydaǵy HHVIII Dúnıejúzilik qysqy Ýnıversıada oıyndaryna qatysty. Sonymen qatar, bul ýaqytta birqatar sport túrlerinen Álem chempıonaty, Álem kýbogynyń kezeńderi ótedi. Soǵan qaramastan, bizdiń komandanyń quramynda Denıs Ten, Elızabet Tursynbaeva (mánerlep syrǵanaý), Roman Krech, Denıs Kýzın, Ekaterına Aıdova, Dmıtrıı Babenko (bári de – konkımen júgirý sporty), Dmıtrıı Reıhard (frıstaıl-mogýl), Alına Raıkova, Galına Vıshnevskaıa (ekeýi de – bıatlon), Nıkolaı Chebotko (shańǵymen júgirý), Aıdar Bekjanov (short-trek), Marat Japarov (shańǵymen tuǵyrdan sekirý) syndy halyqaralyq dodalarda oza shaýyp júrgen sportshylar óner kórsetetin bolady. Jalpy, Qazaqstannyń namysyn bul oıyndarda 116 sportshy qorǵaıdy.
Aıta keteıik, Sapporo qalasy Azııa oıyndaryn osymen úshinshi ret qabyldap otyr. Jalpy, Japonııa jerinde bul doda tórt ret uıymdastyrylǵan. Osydan alty jyl buryn Aq Azıada Astana men Almaty qalalarynda ótkizilgen edi. Ol kezde Qazaqstan quramasy 32 altyn jeńip alyp, jalpykomandalyq esepte jeke-dara kósh bastaǵan bolatyn.
VIII qysqy Azııa oıyndarynyń ashylý saltanatynda tý ustaýshy, shańǵy jarysynan Qazaqstannyń bes dúrkin chempıony Erdos Ahmadıev Qazaqstan sporttyq delegasııasyn bastap shyǵady.
Bek TО́LEÝOV
ASTANA