Táttimbet tarshylyq kórip tur. Qaraǵandyda osydan 65 jyl buryn irgetasy qalanyp, uly kúıshiniń aty berilgen óner kolledjiniń áli kúnge deıin ǵımaraty joq. Kolledj kóshpendilerdiń kúıin keshýge májbúr. Qazir burynǵy qan ortalyǵynda otyrǵan oqý orny osy ýaqytqa deıin 4 ǵımarat aýystyrypty. Kóship-qonyp júrgende qanshama aspaptar synǵan... Keńjaılaý kúılerdi tar bólmede mehnatty azappen birge tartyp otyrǵan óner ıelerine obal-aq... Ustazdar men stýdentterdiń aıtýynsha, shyrqaı án salyp, shyr aınala bıleýge qurqyltaıdyń uıasyndaı tar ǵımarat tipti de qolaısyz. Mýzykalyq aspaptardy ornalastyrý, sahna jasaqtaý, kórermen tartý jáne eń mańyzdysy, bir-birine bóget jasamaı dáris alý múmkin emes. Ári bul oryn óner kolledjine qoıylatyn sanıtarlyq-tehnıkalyq, epıdemıologııalyq talaptarǵa óreskel qaıshy. Ǵımarattyń tar dálizderinde aýyr mýzykalyq aspaptardy alyp júrýdi bylaı qoıǵanda, eki adamnyń qatar júrýi de muń bolyp tur. Al synyp jetpeı qalǵan stýdentter osy dálizde turyp dáris alýǵa, emtıhan synaqtaryna daıyndalýǵa májbúr.
Kolledj basshylyǵy tar kabınetterdi biriktirip, keńeıtken. Biraq áý basta ózge salaǵa beıimdelip jasalǵan ǵımarattyń jaıy kelispeı tur. Táttimbet atyndaǵy óner kolledji úrmeli aspaptar orkestriniń dırıjeri Qaıyrjan Qasymovtyń aıtýynsha, dybystar gýildep, shyǵarmalardyń taza oryndalýyna kedergi keltiredi eken. Ári dál irgedegi ózge synyptardaǵy sabaqtarǵa bóget jasaıdy. Sahna degen atymen joq. Esesine emtıhan, akademııalyq konsertter osynda ótedi. Árıne, talapqa saı kelmeıdi. Biraq basqa amal da joq.
− Bizde 500-ge jýyq stýdent bar. 19 mamandyq boıynsha shákirt tárbıelep otyrmyz. Teatr ártisteri, mádenıet qyzmetkerleri, kásibı ánshi-kúıshiler men kitaphanashylarǵa bilim ustartyp kelemiz. Bir kem dúnıe – ǵımarat. Osy jaǵdaıda otyryp, jaqsy nátıjelerge qol jetkizýge tyrysamyz. Byltyr syrttan baqylaý reıtıngisi boıynsha respýblıkada Táttimbet kolledji birinshi oryn aldy. Bizdiń de konsert bergimiz, damyǵymyz keledi. Biraq, repetısııa jasaıtyn oryn joq. Bilim basqarmasy dybys stýdııasyn, ınteraktıvti taqta bermekshi. Ony qaıda ornatpaqpyz? Tájirıbelik sabaqtar jataqhanada, qaladaǵy teatrlarda ótedi. Bıyl kolledjdiń qurylǵanyna 65 jyl tolady. Túıtkildi máseleni ońtaıly sheshýge oblys basshylyǵy qam jasap jatyr deıdi. Ǵımarat berilip jatsa, – úlken toı sol bolmaq, – dedi kolledj dırektory, belgili ánshi Meıirhan Adambekov.
Bul birneshe jyldan beri sheshimin tapaı kele jatqan másele. Májilis depýtaty, «Nur Otan» fraksııasynyń múshesi Nurlan Dýlatbekov ǵımarattyń jaǵdaıy adam shoshyrlyq eken. Bul Qaraǵandynyń mádenı murasy emes pe? Sondyqtan, óte ókinishti. Biz máseleni Bilim jáne ǵylym, Mádenıet jáne sport mınıstrlikteriniń aldyna qoıyp, túbegeıli sheshýge atsalysamyz. О́ıtkeni, Táttimbet kolledjiniń múshkil hali bárimizdi alańdatady. Taıaý arada jańa ǵımaratqa kóshirilýi úshin tabandy jumys júrgizemiz, dep ýáde berip otyr.
Jaǵdaı osylaı bolsa-daǵy, sońǵy 5 jylda kolledjdiń 40-tan astam stýdenti halyqaralyq baıqaýlarda baq synap, júldeli oryndardan kóringen. Án ortalyǵyn qan ortalyǵynan jańa ǵımaratqa dereý kóshirsek, aldaǵy ýaqytta bul jetistikterdiń eselene túsetinine kúmánimiz joq.
Mıras ASAN, «Egemen Qazaqstan»
QARAǴANDY