Jympıtyda Alash tarıhyna tikeleı qatysty úsh ǵımarat bar, olar: salynǵanyna 127 jyl bolǵan meshit, qazaqtyń alǵashqy dárigerleri Dáýletshe Kúsepqalıev, Baqtyǵalı Bısenov, Halel Dosmuhameduly qyzmet etken aýrýhana-lazarettiń bir bóligi jáne Kúnbatys Alashorda úkimetiniń eki qabatty ǵımaraty. Bul ǵımarattar memleket qorǵaýyna alynǵan.
Alashorda úkimeti Batys bólimshesiniń tóraǵasy Jahansha Dosmuhamedov pen áriptesi Halel Dosmuhamedovtiń jumys keńsesi bolǵan ataman Tarakanovtyń úıi sovet kezinde de birde NKVD, áskerı komıssarıat, aýdandyq mádenıet bólimi jáne basqa da keńse qyzmetin atqardy. Tek 2007 jyly ǵımarat kúrdeli jóndeýden ótip, Syrym Datuly atyndaǵy tarıhı-ólketaný mýzeıiniń balansyna berilgen. Búginde jeke mýzeı mártebesi joq, resmı túrde «Alash zaldary» dep atalatyn bul ǵımaratta Alash qozǵalysy tarıhyna arnalǵan 400-deı jádiger, qujattar, fotosýretter ornalasqan.
– Alash qozǵalysynyń 100 jyldyǵyna oraı bıyl aýdanda irili-usaqty 25 shara uıymdastyrý josparlanǵan. Onyń ishinde «Alash jolymen» atty Jympıty-Semeı baǵytynda tarıhı-tanymdyq ekspedısııa, Máskeý qalasynda J.Dosmuhameduly jerlengen Don zıratyna ekspedısııa, respýblıkalyq ǵylymı-tájirıbelik konferensııa, «Azattyqty ańsaǵan Alash» derekti fılminiń tusaýyn kesý, aqyndar músháırasyn ótkizý sekildi sharalar bar, – deıdi Syrym Datuly atyndaǵy tarıhı-ólketaný mýzeıiniń dırektory Aınagúl Oıshybaeva.
Jaqynda Batys Qazaqstan oblysynyń ákimi Altaı Kólginov Alashorda murajaıyna arnaıy keldi. Murajaı jádigerlerimen tanysqan óńir basshysy Alash qozǵalysynyń 100 jyldyǵy qarsańynda murajaı ǵımaratyn jańǵyrtýdan ótkizý jaıly usynysty birden qoldady. Salynǵanyna 150 jyl bolǵan ǵımarattyń qazirgi jaǵdaıyna saraptama jasalyp, jańǵyrtý jospary, smetasy bekitilýi tıis.
Buǵan qosa, Syrym Datuly atyndaǵy tarıhı-ólketaný mýzeıin de jeke ǵımaratqa kóshirý máselesi sheshilip tur. Aınagúl Baqtyǵulqyzynyń aıtýynsha, mýzeı qorynda jalpy sany 5 myńdaı qundy jádiger bar eken.
Qazbek QUTTYMURATULY, «Egemen Qazaqstan»
ORAL