Parlament Májilisiniń depýtaty Irına Smırnova qazaqstandyq muǵalimderdiń, tárbıeshilerdiń jáne pedagogıkalyq mekeme jumysshylarynyń jalaqysyn ósirýdi surady, dep habarlaıdy Tengrinews.kz tilshisi.
“Pedagogtar ujymynyń qyzmetine qatysty, jalaqy somasyna qaraǵanda, artylǵan mindetterdi oryndaýdyń múmkindigi kúmán týǵyzady. Balabaqsha tárbıeshisiniń jalaqysy – 40 myń teńge, endi jumysqa turǵan muǵalimdiki 46 000 teńge. Tárbıeshiler men muǵalimderdiń jalǵyz “motıvatory” – balalarmen jumys isteýi, balalardyń ózi”, – dep atap ótti depýtat premer-mınıstrdiń atyna joldaǵan saýalynda.
Irına Smırnova muǵalimderdiń qosymsha mindetteri bar ekenin aıtyp otyr.
“Alatyn az kólemdegi jalaqysymen qatar qosymsha mindetteri kóp, ony qoǵamdyq jumystar dep júrmiz. Máselen, jalpy bilim berýdi alaıyq. Árbir muǵalim qalanyń, aýyldyń ýchaskesine bekitilip qoıǵan, ol ár ýchaskeni úsh ret aınalyp ótýi tıis, bul ýchaskesinde kópqabatty úıler nemese ondaǵan jeke úı, saıajaı massıvi bar, ondaǵy 0-18 jas aralyǵyndaǵy balalardy tirkep shyǵýy tıis. Tirkeýge málimetti bergisi kelmeıtin turǵyndar da bar, onyń ústine bergen málimeti úshin turǵyndar jaýapkershilik arqalamaıdy. Tipti málimet bergisi kelmeı, ıtin aıtaqtap otyratyn azamattar da barshylyq. Muǵalimniń qandaı qaýip-qaterde júrgenin eshkim oılamaıdy, oqytýshylardyń kóbi áıelder, olar jumys ýaqyty aıaqtalǵannan keıin esh aqysyz qoǵamdyq jumystarǵa tartylady. Al ýchaskesinde balalar bolsa, olardyń qaıda oqıtynyn anyqtap, tirkeýi tıis. Ýchaskesinde oqýǵa tartylmaǵan bala bolsa, dırektorǵa, osyǵan jaýapty dırektor orynbasaryna qatysty jumystan bosatýǵa deıin másele kóteriledi. Jalpy alǵanda el muǵalimderi bir jyl ishinde úsh márte halyq sanaǵyn júrgizip shyǵady”, – deıdi Smırnova.
Sonymen qatar, aıtýynsha, Almatydaǵy qoǵamdyq kólikte jolaýshylar tasymaldaýǵa arnalǵan “Ońaı” jol júrý qujatyn túgeldeı muǵalimder esh aqysyn júzege asyrady.
“Al kólik uıymdary memlekettik te emes, jeke. Onyń ústine – qujattar óte kóp, jumys jospary tyǵyz: kúntizbelik, uzaqmerzimdi, ortasha merzimdi, sabaq jospary, óziniń jeke damýynyń jospary, mektep bólimshesiniń belgili bir jospary, osylaı kete beredi”, – dedi depýtat.
Smırnovanyń aıtýynsha, muǵalimder osy mindettiń barlyǵyn oryndap, isiniń dáleli retinde fotoesep, ssenarıı, oqýshylardyń essesi, áriptesteri men ata-analardyń pikiri túrindegi jumys ótkizýi tıis. “Synyp jýrnalyn engizý, áli qaǵaz túrindegisi alyp tastalǵan da joq, ústine elektrondyq jýrnaly da qosylyp otyr. Bilim alyp jatqan balalar týraly málimetterdi Ulttyq bilim berý bazasyna qosý, onda árbir balaǵa kóptegen suraq qoıylady, jaýaby talap etiledi. Bul aqysyz isteletin ári atqarylýy qıyn jumystar. Júıeniń qyzmeti boıynsha arnaıy mólsherleme joq”, – dedi ol.
Osylaı deı kele, depýtat muǵalimderdiń, tárbıeshilerdiń, pedagogıkalyq mekeme jumysshylarynyń jalaqysyn ósirýge qarajat tabýdy, muǵalimderdiń biliktiligin arttyrý júıesin tıimdi etý múmkindikterin qarastyrýdy, ony qashyqtyqtan júzege asyrý formasyn engizýdi, mektep muǵalimderiniń ádistemelik birlestikteriniń jetekshileriniń aqysy máselesin sheshýdi, muǵalimderdiń kúshin balalardy tárbıeleýmen jáne bilim berýmen baılanysy joq belgili bir mindetterdi oryndaý úshin paıdalanbaýdy surady.
О́tinishke “Halyq kommýnısteri”, “Aq jol”, “Nur Otan” fraksııalarynyń depýtattary jáne Qazaqstan halqy assambleıasy májilismeni qol qoıdy.