Astana qalasynyń ákimi Áset Isekeshev halyqqa esep berý jıynynda balabaqshaǵa arnalǵan avtomatty baǵyttaý júıesin engiziletinin málimdedi.
«Turǵyndar balabaqsha oryndarymen qamtamasyz etý máselesin alǵa tartyp otyr. Sondyqtan 2017 jyldan bastap tolyqqandy avtomattandyrylǵan baǵyttaý júıesi engiziledi. Osynyń arqasynda barlyǵy ashyq ári túsinikti bolady», – dedi Isekeshev.
Ol Memlekettik-jeke menshik áriptestik aıasynda bıyl úsh balabaqsha, eki memlekettik mektepke deıingi mekeme qoldanysqa engiziletinin, sondaı-aq alty mekemeniń qurylysy bastalatynyn málimdedi.
«Biz memlekettik tapsyrysty 37 jańa jekemenshik balabaqshaǵa engizemiz. Bıyl bul kezekti aıtarlyqtaı azaıtyp, sonymen birge 2020 jylǵa deıin Memlekettik-jeke menshik áriptestik mehanızminiń arqasynda 138 jekemenshik balabaqsha ashýdy josparlap otyrmyz», – dedi ákim.
Sonymen qatar, 2017 jyly mektepke deıingi mekemelerdi qarjylandyrý úshin 10 mıllıard teńge bólingenin málimdedi.
Búginde elordada 261 mektepke deıingi mekeme jumys istep tur. Onyń 91 – memlekettik, 116 – jekemenshik jáne 46 – shaǵyn ortalyq.
Sońǵy úsh jylda mektepge deıingi búldirshinderdiń qatary 32 paıyzǵa artqan. 2013 jyly olardyń sany 72 myńdy qurasa, byltyr 95 myńǵa jetken.