Qazaqstan BUU Qaýipsizdik keńesiniń turaqty emes múshesi retinde óńirlik jáne halyqaralyq qaýipsizdikke qatysty máselelerdi sheshýge kúsh salady. Bul týraly búgin elordada Sırııadaǵy jaǵdaıdy retteý jónindegi Astana prosesiniń jalpy otyrysyn ashqan Syrtqy ister mınıstriniń orynbasary Aqylbek Kamaldınov málimdedi, dep habarlaıdy QazAqparat
«Memleket basshysynyń bitimgershilik bastamalary, sonymen qatar búkil álemdegi elder arasyndaǵy janjaldardy sheshý men shıelenisterdi qysqartýdaǵy úlesi halyqaralyq deńgeıde moıyndalǵan. Qazaqstan búgingi sharanyń barynsha jemisti bolaryna shynaıy úmit artady. Biz progress bolatyndyǵyna jáne soǵysty toqtatý rejiminiń júzege asyrylatyndyǵyna úmittenemiz», – dedi A.Kamaldınov.
Sondaı-aq ol Qazaqstan 2017-2018 jyldary BUU Qaýipsizdik keńesiniń turaqty emes múshesi retinde óńirlik jáne halyqaralyq qaýipsizdikke qatysty máselelerdi sheshýge bar kúshin jumsaıtyndyǵyn basa aıtty.
«Bul turǵyda biz Sırııa boıynsha máselelerdi retteýge de óz úlesimizdi qosýǵa daıynbyz», – dedi vıse-mınıstr.