zańdylyqtardyń saqtalýymen qatar, áleýmettik máselelerdiń sheshimin tabýyna yqpal etedi
Qostanaı oblystyq prokýratýrasy ótken jyldyń jumys nátıjelerin qorytyndylady. Osyǵan oraı ótken alqa májilisinde oblys prokýrory Marat Qaıypjanovtyń málimdegenindeı, kóp máselede kórsetkishter túzele bastaǵan. Ádette, qylmys pen ádiletsizdiktiń qaı túri de halyqtyń áleýmettik turmysyna keri áser etedi. Sondyqtan sońǵy ýaqytta jergilikti atqarýshy bılik, ókiletti organdar men qadaǵalaý organdary tize qosyp áreket etkende tirlik túzelip sala beretinin kórsetkendeı.
Oblystyq prokýratýranyń birneshe áleýmettik jobany jergilikti ákimdiktermen birlesip júrgizýdi bastaýy osynyń naqty mysaly bolady. Qaı jerde de keń taraǵan qylmystyń túri – urlyq. «Urlyqqa qarsy áreket» jobasy jumys istep kele jatqan 3 jyldyń ishinde qylmystyń osy túri úshten birge deıin azaıǵan. Mal, kólik, uıaly telefon urlyǵy aldyńǵy jylmen salystyrǵanda edáýir tómendegen. Páterge túsetinderdiń joly 22 paıyzǵa kesilgen. О́ıtkeni, osy joba aıasynda kóp jumys júrgizildi. Oǵan kásipkerler, páter kooperatıvteri, ákimdikter tartyldy. Maldyń barlyǵy qujattaldy, ortalyqtandyrǵan jaıylymdarǵa shyǵarý uıymdastyryldy, úılerge beınekameralar men domofondar ornatý qadaǵalandy, avtoturaqtarǵa kúzet qoıyldy. Osy jobanyń arqasynda qylmys ótken jyly 14 paıyzǵa azaıǵan.
Ádildik barlyq salada aqsap jatady, onyń saqtalýyn prokýratýra qadaǵalaıdy. Ishki ister organynyń ózinde tergeýshiler tarapynan bolǵan azaptaý faktileri ótken jyldary jıi qylań beretin. BUU komıtetiniń 2012-2014 jyldarǵy sheshimderi negizinde oblystyń eki turǵyny 2007-2008 jyldary azaptaý qurbandary bolyp tanylǵan edi. Sondaı-aq, 2015 jyly azaptaýǵa baılanysty aryzdar sany 63-ke jetken bolatyn. Tipti, ótken jyldyń birinshi jartysynda prokýratýraǵa tergeý barysynda azaptalǵanyn aıtqan 28 aryz túsken.
О́tken jyly osy keleńsiz kórinistiń jolyn kesýge prokýratýra ózi kiristi «Azaptaýǵa jol bermeımiz» atty jobany iske qosty. Onyń sheńberinde tergeý oryndaryna 337 beınekamera, Ishki ister basqarmasynda 83 beınequrylǵy prokýrorlarmen onlaın qaraý qyzmetine qosyldy. Jetkizilgen adamdarmen saýaldama toltyrý tájirıbege engizildi, ýchaskelik ınspektorlar beketterinde prokýratýra jáshikteri qoıyldy. Túzeý mekemelerinde etaptardy qabyldaǵanda prokýrordyń mindetti túrde qatysýy, beınejazba júrgizý qamtamasyz etildi jáne árbir sottalǵan adam kem degende toqsanyna bir ret jeke qabyldaýda boldy.
Oblystyq prokýratýra jergilikti ákimdiktermen, áleýmettik salalarmen birlesken jobalaryn bıyl da odan ári jalǵastyra beredi. Olardyń qataryn «Teń múmkindikter» áleýmettik jobasy tolyqtyra túsetin bolady. Onda prokýratýranyń qadaǵalaýymen múmkindigi shekteýli azamattarǵa arnalǵan ınfraqurylymdyq máselelerdiń sheshimin tabýyna yqpal jasalady. Bul ǵarip jandardyń qalypty ómirge qaıta oralýyna qajetti kómekti kóbeıte túseri sózsiz.
Sonymen, bıyl oblystyq prokýratýra 8 jobany júzege asyrmaq. Olardyń sheńberinde quqyq buzýshylyqtar rettelip, zańdylyqtardyń oryndalýymen qatar, áleýmettik máselelerdiń sheshimin tabýyna da múmkindikter týady.
Názıra JÁRIMBETOVA,
«Egemen Qazaqstan»
QOSTANAI