Aqpan aıynyń basynda Qazaqstan Fýtbol federasııasy atqarýshy komıtetiniń otyrysy ótip, Shyǵys Qazaqstan oblysynyń «Altaı» komandasy premer-lıgadan shyǵaryldy. Bul jańalyq biraz jankúıerdiń narazylyǵyn týdyrdy. Degenmen, sheshim qabyldandy. Tártip bárine ortaq. Endi «Altaıdyń» ornyna premer-lıgada «Taraz» fýtbol klýby óner kórsetetin bolady.
Sóıtip, byltyr ǵana birinshi lıgada ekinshi oryn ıemdenip, premer-lıgaǵa joldama alǵan klýbqa qatań jaza qoldanyldy. Sebebi, bul ujymda sertıfıkattaý sharttary men qaǵıdalary oryndalmaǵan. Iаǵnı, zańdy tulǵanyń qurylymynda fýtbol ortalyǵy men ekinshi lıga birinshiligine qatysatyn jastar arasyndaǵy komandasy joq, sondaı-aq, aımaqtyq fýtbol federasııasynda úsh jyldyq músheligi joq.
Premer-lıgadaǵy bosaǵan oryndy chempıonat reglamentiniń talaptaryna saı, 2016 jylǵy maýsymda «ótpeli matchta» oınaǵan «Taraz» fýtbol klýby basatyn bolyp bekitildi.
«Altaı» komandasynyń jankúıerleri oblys ákimi Danıal Ahmetovten kómek suraǵan edi. Alaıda, aımaq basshysy memlekettik resýrstardy durys paıdalanbady dep «Altaı» fýtbol klýbynyń basshylyǵyn aıyptady.
– Byltyrǵy jyly biz eki klýbty biriktirdik. Jańadan komanda jasaqtap, jaqsy qarjymen qamtamasyz ettik. Joǵary bilikti bapkerdi de shaqyrǵan bolatynbyz. Alaıda, keıin qarjy jaǵyn teksergende, túsiniksiz jaıttardy baıqadyq. Memlekettiń qarjysy qaıda ketip jatqany beımálim. Tipti, tóleý júıesi de túsiniksiz. Memlekettik resýrstardy qalaı bolsa solaı paıdalanǵan. Bizdiń osy jaǵdaıǵa baılanysty taǵar kinámiz de bar. Bul máselemen aınalysa bastadyq. Ázirge komandany kimniń basqaratyny belgisiz. Oblystyq sport basqarmasynyń kelisiminsiz komandany jeńiske jetelegen bapkerdi aýystyryp tastaǵan. Sondyqtan qurmetti jankúıerler, aldymen fýtbol klýbymen, onyń basshylyǵymen ózderińiz aınalysyńyzdar. Eger men kirissem, bári basqasha bolady, – deıdi óńir basshysy.
Serjan Shaıjúnisov basqaratyn klýb basshylyǵy QFF sheshimine qarsylyq tanytyp, sońyna deıin kúresemiz degen edi. Biraq, ázirge bul áreketten eshteńe shyqpaıtyn tárizdi. Búgingi kúnde komandaǵa jańadan qosylǵan oıynshylardyń kóbisi ózge klýbtarǵa kete bastady.
Mysaly, Semeı fýtbolynyń túlegi, 23 jastaǵy Erkebulan Nurǵalıev «Oqjetpespen» bir jyldyq kelisimshartqa qol qoıyp úlgerdi. Sol sekildi shabýylshy Jasulan Moldaqarev Qostanaıdyń «Tobyl» klýbynyń jeıdesin kıdi. Qazir «Tobylda» shabýyl shebi joǵary básekelestikke ıe. Komandada Toqtar Jańǵylyshbaı, Alekseı Shetkın, Djordje Despotovıch bar. Endi olarǵa Jasulan qosylyp otyr.
Konstantın Zarechnyı, Vıacheslav Kotlıar, Dmıtrıı Shmıdt «Aqjaıyq» sapynda jattyǵyp júr. Eger atalǵan oıynshylar Vahıd Masýdovpen til tabysa alsa, oraldyqtar úshin paıdaly bolary anyq.
Al 35 jastaǵy ardager fýtbolshy Nurbol Jumasqalıev «Tobyldan» ketken soń, osy «Altaıǵa» kelgen edi. Tipti, kelisimshart ta jasasyp úlgergen bolatyn. Jaqynda Nurboldyń Pavlodardyń «Ertisi» sapynda jattyǵyp júrgeni belgili boldy.
Fransýz klýby PSJ-nyń túlegi Mohammed Lamane Dıarra Qazaqstanda qalýdy jón sanaǵan tárizdi. Ol qazir «Qaısar» komandasynda synaqtan ótip jatyr. 24 jastaǵy ámbebap fýtbolshy «Altaımen» bir jyldyq kelisimshart jasaǵan edi. Osy jaǵdaıdan keıin onyń da ketýine týra kelgen sııaqty. Qyzylorda klýby munymen shektelip qalmaǵan. «Altaıdyń» taǵy bir oıynshysy Azat Ersálimov te osy ujymda synaqtan ótip jatyr.
Budan biraz buryn bolgarııalyq tórt maman Qazaqstanda jumys isteıtin boldy degen aqparat taraǵan bolatyn. Biraq Ilıan Ilıevtiń kelgeninen ketkeni tez boldy. «Altaı» attaı qalap ákelgen tanymal bapker birinshi lıgada jumys isteýge qulyqty emes. Keıbir málimetterge sáıkes, onyń eline qaıtyp ketkeni belgili boldy. Endi «Altaıdy» jańa maýsymǵa Borıs Glýshkov daıyndaıdy. Fýtzaldan Qazaqstan quramasynyń eks-bapkeri komandanyń uńǵyl-shuńǵylyn jaqsy biledi. О́tken jyly «ótpeli oıynda» «Tarazdy» jeńip, «Altaıdy» premer-lıgaǵa alyp shyqqan da osy Glýshkov edi.
Bek TО́LEÝOV,
jýrnalıst
ASTANA