Oblys ortalyǵyndaǵy Qamzın men Gagarın kósheleriniń qıylysynda taǵy da qubyr jaryldy. Kóshe toly sý. Qala ákimdigi turǵyndardy aýyz sýsyz qaldyrmas úshin mamandar jumys isteýde dep habarlady.
Qamzın, Gagarın kósheleriniń boıyndaǵy turǵyn úılerge, Qamzın men Semenchenko kósheleriniń boıyndaǵy jeke sektordaǵy úılerge sý berý ýaqytsha toqtatyldy. Turǵyndardyń aıtýynsha, bul aralyqta qubyr jıi jarylady eken. Al qalalyq «Sý arnasy» JShS byltyr bul jerdegi ábden tozyǵy jetken qubyrlardy aýystyryp, jóndemek bolypty. Buǵan deıin, ıaǵnı 12-13 aqpanda Lomov kóshesi boıyndaǵy sý qubyry jarylyp, apat oryn alǵanyn jazdyq. Páterlerimiz sýsyz, jaryqsyz qalǵan-dy. Mektepterde sabaq toqtap, balabaqshalar jabyldy. Tek 13 aqpan kúni ǵana qalaǵa sý berilgen. Qazir muz qatqan jaıaý júrginshiler joly men kóshelerge qum sebilip, qalpyna keltirý jumystary júrgizilýde.
Byltyr da qubyrlar jarylyp, qaqaǵan qysta oblys ortalyǵynyń 7,5 myń turǵyny 5 kún boıy sýyq páterlerde qalǵan edi. Endi, mine, taǵy sol jaǵdaı qaıtalanyp otyr.
Farıda BYQAI,
«Egemen Qazaqstan»
PAVLODAR