Oblystyq ákimdik ǵımaraty janyndaǵy muz aıdyny eriksiz qyzyqtyrady. Ashyq alańǵa jasalǵan muz aıdyny kelýshilerge óte yńǵaıly. Tipti, túski úzilis kezinde memlekettik
qyzmetshilerdiń de konkı teýip, sportpen shuǵyldanýǵa múmkindikteri bar.
Qalalyq sport bóliminiń málimetinshe, syrǵanaqty jasaýǵa jergilikti bıýdjetten 2 mıllıon 263 myń teńge jumsalsa, 1,5 mıllıon teńgege 150-deı konkı satyp alynǵan kórinedi. Muz aıdynǵa kúndiz de, keshkilikte de, senbi-jeksenbi kúnderi de konkı tebýshiler kóp keledi. Osy eki-úsh aıdyń ishinde 5 myńnan asa adam muz ústinde syrǵanap, konkılerdi jalǵa berý esebinen 750 myń teńgege jýyq tabys túsipti.
Balalar arasynda shaıbaly hokkeıden qalalyq týrnır de ótkizildi. Dál osyndaı qarapaıym alańdardan chempıondar ósip shyǵady. Mysaly, Naganoda ótken Qysqy olımpıadanyń qola júldegeri jerlesimiz Lıýdmıla Prokashevany, úsh maýsym qatarynan el chempıony atanǵan «Ertis» hokkeı klýbynyń oıynshylaryn aıtýǵa bolar. Oblys ortalyǵyndaǵy balalar-jasóspirimder sport mektepterinde mánerlep syrǵanaý, hokkeı oınaýshy oqýshylar sany kóbeıýde. Bıyl jalpy qalada 60-qa jýyq muz aıdyny ashyldy.
Oblystyq ákimdik ǵımaraty janyndaǵy muz aıdyny Úkimet basshysy Baqytjan Saǵyntaev osy óńirde ákim bolyp turǵan kezde sonyń bastamasymen 2011 jyly jasalǵan bolatyn. Ákimdik terezelerinen muz aıdynǵa qaraıtyn sheneýnikterdiń jumysqa degen ynta-jigerlerin shyńdap, bir ýaq sergip, konkılerin baılap shynyqsyn degen de bolar, bálkim...
Farıda BYQAI,
«Egemen Qazaqstan»
PAVLODAR
Sýretterdi túsirgen
Valerıı BÝGAEV