Jas mamandar «Sıfrlyq Qazaqstan» baǵdarlamasyn jasaýǵa úles qospaq nıette, dep jazady palata.kz.
«Atameken» Ulttyq kásipkerler palatasynda IT salasyn, qarjylyq tehnologııalardy, sandyq servıs pen E-kommersııany damytý boıynsha másele kótergen baspasóz májilisi ótti.
Brıfıngke «Atameken» UKP Aqparattyq-kommýnıkasııalyq tehnologııalar, bilim berý jáne ınnovasııa komıtetiniń tóraǵasy Murat Ábenov, UKP Basqarma Tóraǵasynyń orynbasary Eldar Jumaǵazıev, Qazaqstannyń IT kompanııalar qaýymdastyǵynyń Tóralqa Tóraǵasy Nurlan Isın jáne UKP janyndaǵy Startap jáne IT-ekojúıeni damytý boıynsha keńes tóraǵasynyń orynbasary Maǵjan Mádıevtiń qatysty.
Brıfıngti ashqan «Atameken» UKP Basqarma Tóraǵasynyń orynbasary Eldar Jumaǵazıev Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýyndaǵy IT-tehnologııasyn damytý boıynsha berilgen tapsyrmany bıznes-qoǵamdastyqtyń júzege asyrýǵa daıyn ekenin atap ótti. Sonymen qatar, Ulttyq kásipkerler palatasynda IT salasyndaǵy jas ókilderdiń qatysýymen startap jáne IT-ekojúıeni damytý boıynsha keńes qurylǵanyn habarlady.
«Atameken» UKP Aqparattyq-kommýnıkasııalyq tehnologııalar, bilim berý jáne ınnovasııa komıtetiniń tóraǵasy Murat Ábenov: «Elbasy Joldaýynda kóptegen máseleler aıtyldy. Kásipkerlikti damytý, maman daıyndaý, IT-tehnologııalar, ınnovasııa, ǵylymı izdenis máseleleri memlekettik organdarǵa ǵana emes, bıznes salasyna da katysty. Sondyqtan da, osy máselelerdi sheshýde memlekettik organdar bıznes-qoǵamdastyqpen birlesip jumys istese eken degen usynysymyz bar. Aıtalyq, bos jumys oryndarynyń elektrondy bazasyn jasaý týraly tapsyrma berildi. Bul IT salasynyń mamandarymen birlesip júzege asyrylady», – dep, qoǵamdaǵy túıtkildi máselelerdi kóterdi.
Komıtet tóraǵasy jumyssyz azamattardy qaıta oqytý, ǵylymı izdenisterge bólinetin qarajattyń ashyqtyǵyn, adamı kapıtaldy arttyrý, jastardy kásipkerlikke tartý, bıznespen aınalysýǵa qyzyqtyrý sekildi máseleler toqtalyp ótti.
Sonymen qatar, «Elbasy Joldaýynda IT salasy úshin tapsyrmalar aıqyn kórsetildi. Elimizde IT salasyn damytý úshin birneshe baǵytty aıqyndadyq. Eń aldymen, Qazaqstan Respýblıkasynyń IT salasyndaǵy senimdi baǵdarlamalarynyń tizimin jasaý kerek. Sebebi, bizde barlyǵyn shet elden alý úırenshikti bolǵan. Al ózimizde qandaı dúnıeler bar ekeni bir jerge jınaqtalý kerek. Ekinshiden, IT baǵdarlamalyq ónimderiniń senimdi jetkizýshiler ınstıtýtyn qurýdy usynamyz. Sonymen qatar, aqparattyq-ekonomıkalyq qaýipsizdikti kúsheıtý. Sebebi, bul sala óte mańyzdy. Hakerlerden, kıber atakalardan saqtaný kerek. Sonymen qatar ózin-ózi basqarý prınsıpimen jumys isteıtin tehnopark qurýdy usynamyz. Ol tehnologııalyq kásipkerlikti tartatyn platformaǵa aınalady», – dep Qazaqstannyń IT kompanııalar qaýymdastyǵynyń Tóralqa Tóraǵasy Nurlan Isın usynystaryn atap ótti.
Nurlan Isın elimizde memlekettik organdardyń pármendi yqpalymen aqparattyq-tehnologııalyq kommýnıkasııany damytýdyń keshendi sharasy men strategııasyn bekitý, aqparttyq tehnologııaǵa uzaq merzimdi tapsyrysty qurý, salaǵa qajetti mamandardyń áleýeti men bilim berýdi damytý qajet ekenin naqtylady.
«Atameken» UKP janyndaǵy Startap jáne IT-ekojúıeni damytý boıynsha keńes tóraǵasynyń orynbasary Maǵjan Mádıev Memleket basshysynyń IT-startaptardyń halyqaralyq tehnoparkin qurý týraly tapsyrmasyn Keńes músheleri zor yntamen qabyldaǵandaryn jetkizdi.
«Startaptar, tehnologııalyq sala týraly aıtsaq, Qazaqstanda bul sala kesh damyp otyr. Jobalar óte kóp, biraq IT-ekojúıesin qurý kerek. Kelesi jyly ashylatyn tehnopark elimizdegi IT júıesin damytýǵa kóp kómegi tıedi. Tehnologııalyq bızneske moıyn buratyn kez keldi. Jastardyń osy salada startaptardy bastaýy mańyzdy. Árdaıym kómektesýge, qoldaýǵa daıynbyz», – dep, jastardy kásipkerlikte dál tehnologııalyq salany tańdaýǵa shaqyrdy.
Spıkerlerdiń pikirinshe, otandyq IT-kompanııalardyń tizilimin, senimdi baǵdarlamalyq ónimderdiń Ulttyq tizilimin qabyldaýda jáne IT-ónimderdiń aqparattyq qaýipsizdigin sertıfıkattaýda, sheteldik jekelegen baǵdarlamalyq qamtamasyz etýinen kezeń-kezeńimen bas tartýda memlekettik qoldaý kórsetilý kerek.
Spıkerler brıfıngti qorytyndylaı kele, «Sıfrlyq Qazaqstan» memlekettik baǵdarlamasyn jasaýǵa belsendi qatysýǵa daıyn ekendikterin jetkizdi.