Belarýstiń «Beloıl» kompanııasy Irannyń ulttyq munaı kompanııasymen 80 myń tonna munaı satyp alý týraly kelisimshart jasasty. Bul týraly derekkózderge silteme jasap Reuters habarlady, dep jazady abctv.kz.
Bul Belarýs pen Iran arasynda munaı jetkizý jónindegi alǵashqy mámile, deıdi agenttik.
«Beloıl» men NIOC ókilderinen ol jaıynda málimet alý múmkin bolǵan joq. Munaı treıderleri ortasyndaǵy derekkózge sensek, tankerlerge munaı tıeý 20 aqpanǵa qaraı bastalýy múmkin. Jetkizýdiń logıstıkasy naqty belgisiz, degenmen ıran munaıy aldymen Qara teńizdegi Odessa portyna, keıin Baltyq teńizindegi Ventspılske jetkizilip, sodan soń temir jolmen Belarýske jol tartýy yqtımal.
Búginde Belarýs Reseıden munaı jetkizýdiń shektelýine baılanysty munaıdyń balamaly kózderin qarastyryp jatyr. Úkimetke tıisti tapsyrmany eldiń prezıdenti Aleksandr Lýkashenko bergen. Byltyr reseı munaıyn jarym-jartylaı ázerbaıjandyq Socar almastyrǵan bolatyn. Atalmysh kompanııa Belarýske 560 myń tonna munaı jóneltti. Qańtarda ony tasymaldaý aıaqtaldy, dep atap kórsetedi trekkıngtik málimetterge silteme jasaǵan agenttik.